قازاقستاننىڭ پرەمەر-مينيسترى اسقار مامين دەنساۋلىق ساقتاۋ مينيسترلىگى مەن ءبىرقاتار ءوڭىر باسشىلارىنا تاپسىرما بەردى.

– بۇگىندە كوروناۆيرۋستىڭ "قىزىل" ايماعىنا 5 ءوڭىر كىرەدى. ونىڭ ىشىندە نۇر-سۇلتان قالاسى جانە اتىراۋ، پاۆلودار، اقمولا، قوستاناي وبلىستارىنا تاعى دا ءبىر وبلىس سولتۇستىك قازاقستان ءوڭىرى قوسىلدى. جالپى رەسپۋبليكا بويىنشا ۆيرۋستىڭ رەپرودۋكتيۆتىك كورسەتكىشى 1،1ء-دى قۇرايدى. ينفەكسيالىق توسەك ورىنداردىڭ جۇكتەمەسى – 32%، رەانيماسيالىق توسەك ورىندار – 23%. بۇگىنگى تاڭداعى ەڭ ماڭىزدى مىندەت – حالىقتى جاپپاي ۆاكسينالاۋدى ۇيىمداستىرۋ. QazCovid-in وتاندىق ۆاكسيناسى كلينيكالىق سىناقتاردىڭ III كەزەڭىنەن وتۋدە (الدىن الا تيىمدىلىگى – 96%). "سپۋتنيك V" ۆاكسيناسىنىڭ ساپاسىن اتتەستاتتاۋ جۇمىستارى جۇرگىزىلىپ جاتىر. GMP ستاندارتى بار ۆاكسينالار شىعاراتىن بيوفارمزاۋىت سالىنىپ جاتىر، – دەدى ول.

ۇكىمەت باسشىسى ەپيدەميولوگيالىق جاعدايدى ەسكەرە وتىرىپ، وڭىرلەردەگى جاعدايدى تۇراقتاندىرۋ ءۇشىن شۇعىل شارا قابىلداۋ قاجەتتىگىن اتاپ ءوتتى.

– دەنساۋلىق ساقتاۋ مينيسترلىگىنە اكىمدىكتەرمەن بىرلەسىپ، 1 اقپاننان باستاپ مەديسينالىق ۇيىمداردىڭ حالىقتى "سپۋتنيك V-مەن" جاپپاي ۆاكسينالاۋدى باستاۋعا دايىن بولۋىن قامتاماسىز ەتۋدى تاپسىرامىن. سونىمەن بىرگە مەديسينا قىزمەتكەرلەرىن وقىتۋ قاجەت. 1 اپتا مەرزىمدە ەگۋ پۋنكتتەرىنىڭ ازىرلىگىن جانە تۇراقتى قامتاماسىز ەتۋ ماسەلەلەرىن شەشۋدى تاپسىرامىن. ەكىنشى، وڭىرلەردىڭ اكىمدەرىنە ەپيدەميولوگيالىق جاعداي ناشارلايتىن بولسا، شەكتەۋ شارالارىن قابىلداسىن، – دەپ ءسوزىن تۇيىندەدى ا. مامين.