"2 ميلليارد دوللارعا باعالانعان كازينو كومپانياسىنىڭ باس ديرەكتورى ايەلىمەن بىرگە COVID-19 ۆاكسيناسىن تەزىرەك ەكتىرۋ ءۇشىن دۇرىس ەمەس اقپارات بەردى" دەگەن ايىپ تاعىلعاننان كەيىن جۇمىستان كەتتى.
"The Great Canadian Gaming" كازينو كورپوراسياسىنىڭ قىزمەتكەرى رود بەيكەر مەن ونىڭ ايەلى ەكاتەرينا ەرتەرەك ۆاكسينا ەكتىرۋ ءۇشىن الىستاعى يۋكون تەرريتورياسىنا بارعان. "كوپتەگەن بايىرعى امەريكالىقتار تۇراتىن ايماقتا ۆاكسيناسيا كەزەگىنىڭ جىلجۋ جىلدامدىعى كانادانىڭ باسقا ايماعىنان تەزىرەك" دەلىنگەن دەرەكتەردە.
ەرلى-زايىپتىلار وزدەرىن شاعىن ءقوناقۇيدىڭ جۇمىسشىلارى رەتىندە تانىستىرعان.
اقش-تىڭ الياسكا شتاتىمەن شەكارالاس بيۆەر-كريك شاعىن قوعامداستىعىندا ۆاكسينا ەككىزگەن سوڭ كازينونىڭ باس ديرەكتورى تىكەلەي اۋەجايعا اپارۋدى وتىنگەن. ولاردىڭ بۇل ارەكەتى كۇدىك تۋدىرعان سوڭ، تەكسەرۋ باستالىپ، ناتيجەسىندە تەزىرەك ۆاكسينا الۋ ءۇشىن ەرلى-زايىپتىلاردىڭ جالعان اقپارات بەرگەنى انىقتالعان.
"مەنى وسىنداي ءوزىمشىل مىنەز-قۇلىق اشۋلاندىردى" دەدى يۋكوننىڭ قوعامدىق قىزمەتتەر ءمينيسترى دجون سترەيكەر.
جەرگىلىكتى بايىرعى ۇلتتىڭ كوشباسشىسى اندجەلا دەميت ءوزىنىڭ Facebook پاراقشاسىندا "ءوزىمشىل ادامدار ءبىزدىڭ قارتتارىمىز بەن دەنساۋلىعى ءالسىز ادامدارىمىزدى قاۋىپكە قالدىردى" دەپ جازدى.
ال ەرەجە بۇزعان ەرلى-زايىپتىلارعا ۆانكۋۆەر قالاسىنان يۋكونعا كەلگەننەن كەيىن 14 كۇن وزدەرىن وقشاۋلاماعانى ءۇشىن ايىپپۇل سالىندى.
پىكىر قالدىرۋ