بەلگىلى تەلەپروديۋسەر سەرىك اباس-شاح facebook پاراقشاسىندا قازاقستاندىقتاردى قازۇۋ قالاشىعى اۋماعىنداعى جەر داۋىنا بەي-جاي قاراماۋعا شاقىردى. جازبا ءماتىنىنىڭ تولىق نۇسقاسى تومەندە ۇسىنىلىپ وتىر.
تاڭەرتەڭنەن بەرى ەكى-ۇش تانىسىم حابارلاستى (جەكەگە شىقتى، سمس تاستادى). رەنجىپ جاتىر، قىسقاسى، "كازگۋ قالاشىعىنا ءتيىستى جەر(لەر)ءدىڭ "بولىنەتىنى ءبولىنىپ"، "ساتىلاتىنى ساتىلىپ" قويعان. ەندى كەلىپ، ەلباسىنىڭ قىزىنا جالباقتاپ حات جازىپ نە بولدى سونشا؟ جازساڭ، دۇرىستاپ جازساڭشى" دەپ...
"رەنىشتەردىڭ" ماعىناسى شامامەن وسىنداي ەندى. ءبىراق "دۇرىستاپ جازۋ" دەگەن نە وسى؟ اسانقايعىلانىپ احىلاپ-ۇكىلەۋ مە، قالعان-قۇتقان شاشىمدى جۇلىپ اشۋ-ىزا ءبىلدىرۋ مە، جوق الدە وسىنىڭ ءبارىن قۇرتقان سەن دەپ ايىپتاۋ ما، ونشا تۇسىنبەدىم.
اعايىن،
ا) "ءبولىنىپ قويدى"، "ساتىلىپ قويدى" دەپ وتىرا بەرسەك، ەشتەڭە وزگەرمەيدى. بۇگىن كازگۋ قالاشىعى، ەرتەڭ باسقاسى... ال ارعى كۇنى ءۇيىڭىزدى تارتىپ الىپ جاتسا، "جوعارىداعىلار ءبولىپ قويدى اۋ"، "ءسويتىپ شەشىپ قويدى عوي" دەپ وتىرا بەرەسىز بە؟
ءا) حاتتى الەۋمەتتىك جەلى ارقىلى پرەزيدەنتكە دە، باس پارتيانىڭ باسشىلىعىنداعى ءبىر كىسىگە دە جولدادىم. رەسمي تۇردە بولماسا دا جەتكىزەتىندەر جەتكىزگەن شىعار دەگەن ۇمىتتەمىن. ەندى بۇگىن “جوعارىداعىلارعا” ءسوزى وتەدى عوي دەپ ءاليا نازاربايەۆاعا جولداپ وتىرمىن. ول ۇندەمەسە باسقاسىنا جولدايمىن. باسقاسى "بايقاماسا"، باسقالارىنا تىنىشتىق بەرمەيمىن.
ال ءسىز وتىرا (جاتا) بەرىڭىز. ءبارىبىر ەشتەڭە وزگەرمەيدى.
ايتپاقشى، ۇمىتىپ بارامىن.
قۇرمەتتى كازگۋ تۇلەكتەرى، وسى ماسەلە بويىنشا "ۋلاپ-شۋلاپ" جاتقانداردىڭ سانى(مىز) مول ەمەس. نەگىزى (ءبىز) كوپپىز عوي. نەگە ۇندەمەيسىزدەر؟ سۇيىكتى قالاشىعىمىزدىڭ جەرىن بولشەكتەپ تاراتىپ جاتقاندا، جاندارىڭىز نەگە اۋىرمايدى؟ ستۋدەنتتەر، سىزدەر نەگە بەيعامسىزدار؟ الماتى تۇرعىندارى، قالانىڭ اۋاسى ونسىز دا ۋلانىپ بىتكەنىن جاقسى بىلەسىزدەر. ءقازىر قالانىڭ قاق ورتاسىنداعى بوس جەرلەرگە عيمارات ەمەس، اعاش ەگۋ (وتىرعىزۋ) وتە ماڭىزدى ەكەنىن نەگە ۇقپايسىزدار؟
قازاقستاندىقتار، نەمقۇرايلى بولىپ قالماساڭدارشى! كازگۋ قالاشىعى – قازىرگى اتقامىنەرلەردىڭ اكەلەرىنەن قالعان جەر ەمەس. بۇل اتا-بابامىزدان قالعان ورتاق مۇرا. ونى تويىمسىز شيبورىلەردىڭ جەمى ەتپەي، كەلەر ۇرپاق ءۇشىن ساقتاپ قالايىق. بۇل جەردە ءسىز بەن ءبىزدىڭ بالا-شاعامىز بەن نەمەرە-شوبەرەمىز وقيدى ءالى (بولاشاقتا). ولار دا وسپەي مە، وركەندەمەي مە؟ ولاردىڭ جاسىل جەلەككە بولەنگەن ستۋدەنتتەر قالاشىعىندا ەمەس، بيزنەس ورتالىقتار مەن باي-شونجارلار مەكەن ەتەتىن بيىك ۇيلەر اراسىندا تۇنشىعىپ جۇرگەنىن قالايسىز با؟ مەن قالامايمىن.
پىكىر قالدىرۋ