مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا تاۋەلسىزدىكتىڭ 30 جىلدىق مەرەيتويى كەزىندە ارتىق داڭعازا مەن ىسىراپشىلدىققا جول بەرىلمەيتىنىن ايتتى.
– بيىل قاسيەتتى تاۋەلسىزدىگىمىزدىڭ 30 جىلدىعىن اتاپ وتەمىز. وسىعان وراي، قولعا الىنعان رەفورمالاردى قارقىندى تۇردە جۇزەگە اسىرۋىمىز كەرەك. مەرەيتوي كەزىندە ارتىق داڭعازا مەن ىسىراپشىلدىققا جول بەرىلمەيدى.
ءبىز وسى شارالار ارقىلى بىرلىك پەن كەلىسىمدى نىعايتىپ، وسكەلەڭ ۇرپاقتىڭ بويىنداعى پاتريوتيزم رۋحىن دامىتۋعا ءتيىسپىز. ولاردى ەگەمەندىگىمىزدىڭ جانە مەملەكەتتىلىگىمىزدىڭ قۇندىلىقتارىن باعالاي بىلۋگە ۇيرەتۋىمىز قاجەت، – دەدى ول.
پرەزيدەنت ءوز سوزىندە "ءبىزدىڭ باستى ماقساتىمىز – ازاماتتارىمىزدىڭ تۇرمىس ساپاسىن جاقسارتىپ، تابىسىن ارتتىرۋ" ەكەنىن جەتكىزدى.
ونىڭ ايتۋىنشا، مەملەكەتتىك ورگانداردىڭ ءاربىر شەشىمى، ءاربىر ارەكەتى ەكونوميكانى دامىتۋعا جانە حالىقتىڭ يگىلىگىنە ارنالۋعا ءتيىس.
پىكىر قالدىرۋ