سەنات ءتوراعاسى پاندەمياعا بايلانىستى ۆاكسيناسيالاۋدىڭ ءماجبۇرلى تۇردە جۇرگىزىلمەيتىنىن ايتتى. بۇل تۋرالى ماۋلەن اشىمبايەۆ facebook-تەگى پاراقشاسىنا جازدى.

سەنات سپيكەرى جازباسىندا توقايەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا كوتەرىلگەن ماسەلەلەرگە نازار اۋدارىپ، پرەزيدەنت تاپسىرمالارىنىڭ ماڭىزىنا توقتالعان.

– پرەزيدەنتىمىز قازاقستاندىقتاردىڭ ناقتى تابىسىن ارتتىرۋ، شاعىن جانە ورتا بيزنەستى قولداۋ، ەكونوميكالىق ءوسۋدى قامتاماسىز ەتۋ ماسەلەلەرىنە باسا ءمان بەردى. سونداي-اق قاسىم-جومارت كەمەل ۇلى مەملەكەتتىك شىعىنداردى وڭتايلاندىرۋ، ازاماتتاردىڭ وتىنىشتەرىن قاراۋدىڭ تيىمدىلىگىن ارتتىرۋ جانە ينتەرنەتتىڭ ساپاسى مەن جىلدامدىعىنا قاتىستى ماسەلەلەردى شەشۋ جۇمىستارى بويىنشا تاپسىرمالار بەردى، – دەيدى ماۋلەن اشىمبايەۆ.

سونىمەن قاتار، سەنات ءتوراعاسى ۆاكسيناسيالاۋ ماسەلەسى تۋرالى ءسوز قوزعاپ، بۇل تاقىرىپتىڭ ءقازىر قوعامدا جان-جاقتى تالقىلانىپ جاتقانىن اتاپ وتكەن.

– وسى رەتتە دەنساۋلىق تۋرالى كودەكستى قابىلداۋ كەزىندە سەناتورلار ەمدەۋدەن جانە پروفيلاكتيكالىق ەكپەلەردەن باس تارتۋ مۇمكىندىگى تۋرالى تۇزەتۋلەر ەنگىزگەنىن اتاپ وتكەن ءجون. سوندىقتان الەۋمەتتىك جەلىلەردە ايتىلىپ جۇرگەن كەيبىر پىكىرلەرگە بايلانىستى قازاقستاندا ۆاكسينا ەگۋدى ءماجبۇرلى تۇردە جۇرگىزۋ مۇمكىن ەمەستىگىن ايتقىم كەلەدى.

الايدا، تەك ۆاكسيناسيا ارقىلى عانا پاندەمياعا توسقاۋىل قويۋعا بولاتىنىن ءتۇسىنۋىمىز كەرەك. تاريحتا مۇنداي جاعداي العاش رەت بولىپ وتىرعان جوق. ىندەت جايلاعان كەزەڭدەردە ۆاكسينا ادامزاتتى بىرنەشە رەت امان ساقتاپ قالدى. سوندىقتان ءقازىر تاڭداۋ جاساۋىمىز قاجەت. قانشا ۋاقىتقا جالعاساتىنى بەلگىسىز، ۇلكەن الەۋمەتتىك سالدارى بار كارانتيندىك شەكتەۋلەردى ءارى قاراي كۇشەيتكەن دۇرىس پا، الدە جاپپاي ۆاكسيناسيالاۋ ارقىلى ۇجىمدىق يممۋنيتەت قالىپتاستىرىپ، قالىپتى ومىرىمىزگە قايتا ورالعانىمىز جاقسى ما؟ جاۋاپ اركىمگە تۇسىنىكتى بولار.

ۆاكسيناسيالاۋ – ءماجبۇرلى شارا ەمەس. ءبىراق، تۇتاس حالىقتىڭ دەنساۋلىعىن ساقتاۋ تۇرعىسىنان وتە ماڭىزدى قادام. سوندىقتان مەملەكەتتىك اپپارات پەن قوعامدىق ينستيتۋتتار بۇل باعىتتا ءتۇسىندىرۋ جۇمىستارىن كەڭىنەن جۇرگىزۋگە ءتيىس، – دەلىنگەن جازبادا.

سونداي-اق ماۋلەن اشىمبايەۆ ۇكىمەت وتىرىسىندا پرەزيدەنت بۇدان باسقا دا ماڭىزدى ماسەلەلەرگە توقتالىپ، ۇكىمەت پەن اكىمدەرگە ناقتى مىندەتتەر جۇكتەلگەنىن تىلگە تيەك ەتكەن.

– وسىعان وراي سەنات الداعى ۋاقىتتا ماجىلىسپەن بىرلەسىپ، مەملەكەت باسشىسىنىڭ باستامالارى مەن تاپسىرمالارىن تابىستى ىسكە اسىرۋعا قاجەتتى زاڭدار قابىلداۋ جۇمىستارىنا باسىمدىق بەرەدى، – دەدى سەنات ءتوراعاسى.