جەلىدە رەسەيلىك "سپۋتنيك V" ۆاكسيناسىنىڭ قورقىنىشتى جاناما اسەرلەرىن "دالەلدەيتىن" اۋديوجازبا مەن ۆيدەو تاراتىلۋدا. "COVID-19-عا قارسى ەگىلگەن ەكپە سالدارىنان قازاقستاندىقتاردا السىزدىك، دەنەنىڭ اۋىرسىنۋى، ءتىپتى قۇرىسۋلار بايقالعان. جاعداي بايقوڭىردا بولعان" دەپ شۋلاستى جەلى قولدانۋشىلارى. Stopfake سايتى اقپارات فەيك ەكەنىن مالەمدەدى.

"سپۋتنيك V" ۆاكسيناسياسىنىڭ سالدارى دەپ ۇسىنىلعان ۆيدەو شىن مانىندە ەسكى. ول 2015 جىلى جاڭاوزەندە تۇسىرىلگەن. ول كەزدە قىزىلشاعا قارسى ۆاكسيناسيا 400-گە جۋىق ورتا مەكتەپ وقۋشىسىندا ەرەكشە جاناما اسەرلەر تۋدىرعان بولاتىن. مۇنداي اسەرلەر تەك قىزداردا جانە تەك ناقتى قالالاردا عانا تىركەلدى، ال ۆاكسينانى ەل بويىنشا جۇزدەگەن مىڭ ادام العان. وسىنى ەسكەرە وتىرىپ، ماماندار كەيىنىرەك جاناما اسەرلەردىڭ تۋىنداۋىنا ۆاكسينانىڭ ءوزى ەمەس، جاپپاي پسيحوزدىڭ بولۋى سەبەپ بولدى دەگەن قورىتىندىعا كەلگەن.

قازاقستاندا COVID-19-عا قارسى ۆاكسيناسيا ءالى باستالعان جوق. ونى 1 اقپاندا باستاۋ جوسپارلانىپ وتىر. ءبىرىنشى كەزەكتە ەكپە مۇعالىمدەرگە، مەديسينا قىزمەتكەرلەرىنە جانە تاۋەكەل توپتارىنىڭ باسقا دا وكىلدەرىنە جاسالادى.

سونىمەن قاتار، "سپۋتنيك V" ۆاكسيناسىنىڭ تيىمدىلىگى مەن قاۋىپسىزدىگى كلينيكاعا دەيىنگى جانە كلينيكالىق زەرتتەۋلەرمەن دالەلدەنگەن. ول تىشقاندارعا، پريماتتاردىڭ ەكى تۇرىنە جانە ادامدارعا سىنالدى. حابارلامادا سيپاتتالعان جاناما اسەرلەردىڭ تۋىنداۋى تۋرالى حابارلانعان جوق.