پرەزيدەنت قاسىم-جومارت توقايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتى قابىلدادى، دەپ حابارلادى اقوردا سايتى.
اليك شپەكبايەۆ توقايەۆقا سىبايلاس جەمقورلىققا قارسى باستامالاردىڭ ىسكە اسىرىلۋى جانە ەلىمىزدىڭ Transparency International سىبايلاس جەمقورلىقتى قابىلداۋ يندەكسى بويىنشا ىلگەرىلگەنى تۋرالى ايتتى.
اگەنتتىك ءتوراعاسىنىڭ ايتۋىنشا، جۇيەلى جۇرگىزىلىپ جاتقان ساياسي جاڭعىرۋ مەن سىبايلاس جەمقورلىققا قارسى رەفورمالاردىڭ ارقاسىندا قازاقستان اتالعان رەيتينگتە العاش رەت 38 بالل جيناعان. بۇل ەلدىڭ 19 ساتىعا جوعارى كوتەرىلىپ، 94-ورىنعا تابان تىرەۋىنە مۇمكىندىك بەرگەن.
مەملەكەت باسشىسى اگەنتتىكتىڭ شىعىنداردى وتەۋ جانە ءتيىمسىز جۇمسالعان قارجىنىڭ الدىن الۋ بويىنشا اتقارعان جۇمىسىنىڭ ناتيجەسىندە 95،6 ميلليارد تەڭگەنىڭ كەرى قايتارىلعانىن، ونىڭ ەكونوميكالىق تيىمدىلىگىن وڭ باعالادى. سونداي-اق سىبايلاس جەمقورلىق قىلمىستارىنىڭ 5 پايىزعا تومەندەگەنىن اتاپ ءوتتى.
توقايەۆ سىبايلاس جەمقورلىققا قارسى جاڭا زاڭنامالىق باستامالاردى ساپالى تۇردە جۇزەگە اسىرۋعا جانە ەىدۇ مەن گرەكو ستاندارتتارىنا سايكەس سالالىق زاڭنامانى جاڭعىرتۋدى جالعاستىرۋعا، ونىڭ ىشىندە، شەنەۋنىكتەردىڭ شىعىستارى مەن كىرىستەرى بىر-بىرىنە سايكەس كەلمەگەنى ءۇشىن جاۋاپكەرشىلىك ەنگىزۋ ماسەلەسىنە نازار اۋداردى.
كەزدەسۋ سوڭىندا پرەزيدەنت اگەنتتىك ءتوراعاسىنا جازانى بۇلتارتپاي ورىنداۋ قاعيداتىن قاتاڭ ساقتاۋدىڭ ماڭىزدى ەكەنىن ايتىپ، قىلمىستىڭ الدىن الۋ ىسىندە ازاماتتىق قوعاممەن بايىپتى جۇمىس جۇرگىزۋدى تاپسىردى.
پىكىر قالدىرۋ