ەل ازاماتتارى كولىكتى ءتيىستى قۇجاتتارىن الىپ جۇرمەي-اق، تەك جەكە كۋالىكپەن جۇرگىزۋىنە مۇمكىندىك بەرەتىن جاڭا نورما 13 اقپاننان باستاپ كۇشىنە ەنەدى. بۇل تۋرالى ىشكى ىستەر ءمينيسترى ەرلان تۇرعىمبايەۆ ءمالىم ەتتى.
"مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى. جاڭا زاڭ اعىمداعى جىلدىڭ 13 اقپانىنان باستاپ كۇشىنە ەنەدى. بۇرىن قازاقستاندا جۇرگىزۋشى قۇجاتتارىنىڭ ءبىرىنىڭ جوقتىعى ءۇشىن ەسكەرتۋ (ەگەر العاش رەت بولسا) نەمەسە 5 اەك ايىپپۇل قاراستىرىلعان بولاتىن. ەندى جۇرگىزۋشىلەرگە كولىكتى جۇرگىزگەن كەزدە وزىمەن بىرگە تەك ءبىر عانا قۇجات – جەكە باسىن كۋالاندىراتىن كۋالىكتى الىپ ءجۇرۋ جەتكىلىكتى" دەلىنگەن ءمينيستردىڭ facebook-تەگى پاراقشاسىندا.
مينيستر مالىمەتىنشە، قازاقستاندا بەرىلگەن جۇرگىزۋشى كۋالىگىن، كولىك قۇرالىن تىركەۋ كۋالىگىن، ساقتاندىرۋ ءپوليسىن، سونداي-اق تەحنيكالىق بايقاۋدان وتكەنىن راستايتىن قۇجاتتى پوليسەي پلانشەت ارقىلى تەكسەرەدى. ال ينتەرنەت جەلىسىنە قولجەتىمدىلىك جوق ەلدى مەكەندەردە جانە تاس جولداردا تەكسەرۋ راديوبايلانىس ارنالارى ارقىلى جۇزەگە اسىرىلاتىن بولادى.
جاڭا نورمالاردىڭ قازاقستاندىق جۇرگىزۋشى كۋالىگى جوق شەتەلدىكتەرگە جانە قازاقستاندا تىركەلمەگەن كولىك باسقارۋشىلارىنا قاتىسى جوق.
"اۆتوكولىكتى جۇرگىزۋشى قۇجاتتارىنسىز باسقارۋدىڭ وسىنداي مۇمكىندىگى گرۋزيا، ۋكراينا، پولشا، لاتۆيا، ليتۆا سياقتى مەملەكەتتەردە بار، ول ەلدەردە دە ۇلتتىق زاڭناماعا ءتيىستى وزگەرىستەر ەنگىزىلگەن" دەپ جازدى مينيستر.
