پرەزيدەنت قاسىم-جومارت توقايەۆ ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن كەزدەستى، دەپ حابارلادى اقوردا سايتى.
سايت مالىمەتىنشە، ونلاين فورماتتا وتكەن كەزدەسۋدە توقايەۆ وديل رەنو-باسسونى ەۋروپالىق قايتا قۇرۋ جانە دامۋ بانكىنە پرەزيدەنت بولىپ سايلانۋىمەن قۇتتىقتاعان.
پرەزيدەنت ەۋروپالىق قايتا قۇرۋ جانە دامۋ بانكى قازاقستاننىڭ ماڭىزدى ستراتەگيالىق سەرىكتەسى دەپ باعالاپ، ەكىجاقتى ىنتىماقتاستىق جىلدارىندا اتالعان ينستيتۋت ەل ەكونوميكاسىنا 9 ميلليارد دوللاردان استام ينۆەستيسيا سالعانىن اتاپ ءوتتى. بانك ەۋروپا مەن ازيانىڭ نارىق رەفورمالارىن جانە كاسىپكەرلىك باستامالارىن قولداۋدا ماڭىزدى ءرول اتقاردى.
"توقايەۆ ەۋروپالىق قايتا قۇرۋ جانە دامۋ بانكى ەل ەكونوميكاسىنىڭ باسىم باعىتتارىن ايتارلىقتاي دامىتۋعا سەپتىگىن تيگىزەدى دەپ سانايتىنىن جەتكىزدى. اڭگىمەلەسۋ بارىسىندا ءىرى ينفراقۇرىلىمدىق جوبالاردى قارجىلاندىرۋ، اتاپ ايتقاندا، اۆتوموبيل جولدارىن سالۋ، جاڭارتىلعان ەنەرگيا كوزدەرىن دامىتۋ، قازاقستانداعى گيدروەنەرگەتيكا ماسەلەلەرى تالقىلاندى.
وديل رەنو-باسسو COVID‑19 پاندەمياسىنىڭ عالامدىق نارىققا جانە قازاقستان ەكونوميكاسىنا تيگىزەتىن اسەرى جايىنداعى ەۋروپالىق قايتا قۇرۋ جانە دامۋ بانكىنىڭ بولجامىمەن جانە باعدارىمەن ءبولىستى. ونىڭ ايتۋىنشا، بانك قازاقستان ۇكىمەتىمەن تىعىز ىنتىماقتاستىق ورناتۋعا جانە ەنەرگەتيكا، ينفراقۇرىلىم، ينۆەستيسيا سالالارى بويىنشا جوبالاردى بەلسەندى دامىتۋعا دايىن" دەلىنگەن حابارلامادا.
پىكىر قالدىرۋ