"سوڭعى ايلاردا مالاۆيدە البينيزممەن اۋىراتىندار نىساناعا الىنىپ ولتىرىلۋدە" دەپ مالىمدەدى Amnesty International قۇقىق قورعاۋ ۇيىمى.
وتكەن اپتادا ەكى ادام 12 جاستاعى البينوس قىزدى ۇيىنەن ۇرلاپ اكەتۋگە تىرىسقان جانە باسقا جەردە البييزممەن اۋىراتىن 26 جاستاعى سايدي ديتون ولتىرىلگەن.
ءۇش ەر ادام ونى 27 قاڭتاردا ولتىرگەنىن مويىندادى، ال ءتورتىنشى كۇدىكتى ىزدەۋدە.
بۇل سوڭعى ءتورت ايدا ەلدە البينيزممەن اۋىرعان ادامدارعا جاسالعان جەتى شابۋىلدىڭ ەكەۋى عانا. قاسكويلەر البينوستاردى ولتىرۋگە جانە ۇرلاۋعا تىرىسىپ قانا قويماي، ولاردىڭ قابىرلەرىن دە نىساناعا العان.
بۇعان دەيىن ادام قۇقىعى ۇيىمى ەسەبى البينيزممەن اۋىراتىن ادامداردى "جانۋارلار سياقتى" اۋلاپ، ءولتىرىپ جاتىر دەپ حابارلاعان.
بۇل وقيعالاردىڭ سەبەبى، جەرگىلىكتى "ءداستۇرلى سەنىم" بويىنشا كەيبىرەۋلەر وسى ءالسىز توپتاعى ادامداردىڭ "دەنە مۇشەلەرى مەن سۇيەكتەرى ساتتىلىك بەرەدى" دەپ سەنۋىندە. جەرگىلىكتى ءداستۇرلى "سيقىرشى-ەمشىلەر" البينيزممەن اۋىراتىنداردىڭ دەنە مۇشەسى ارقىلى "باقىتتى ەتەتىن" سۋسىندار جاسايدى. سول سەبەپتى ولار وتە قىمبات باعامەن ساتىلادى.
بۇۇ ادام قۇقىقتارى جونىندەگى جوعارعى كوميسسارى كەڭسەسىنىڭ 2016 جىلعى ەسەبىنە سايكەس، "البينو اڭشىلارى اۋرۋدىڭ بۇكىل دەنەسىن 75000 دوللارعا دەيىن ساتادى".
Amnesty International ادام قۇقىعى ۇيىمىنىڭ افريكانىڭ وڭتۇستىگى بويىنشا ديرەكتورىنىڭ ورىنباسارى مۋلەيا مۆانانياندا سوڭعى شابۋىلدار البينيزممەن اۋىراتىن ادامداردىڭ مۇلدە ءقاۋىپسىز ەمەس ەكەنىن كورسەتەتىنىن ايتىپ، ەسكەرتۋ جاسادى.
– بۇل شابۋىلدار "جازاسىزدىق مادەنيەتىنەن" تۋىندايدى جانە مالاۆيا بيلىگى قىلمىسكەرلەردى ءادىل سوتقا تارتۋ ءۇشىن جەدەل تۇردە ارەكەت ەتۋى كەرەك، – دەپ قوستى ول.
البينيزممەن اۋىراتىن ادامدار قاۋىمداستىعىنىڭ اتقارۋشى ديرەكتورى مەنارد زاحاريا مۆانانياندا حانىمنىڭ پىكىرىن قولداي وتىرىپ، مالاۆي ۇكىمەتى "ىشكى جانە حالىقارالىق ادام قۇقىعى زاڭدارى بويىنشا قۇرباندارعا ادىلەتتىلىكتى قامتاماسىز ەتۋگە مىندەتتى" دەپ مالىمدەدى.
پىكىر قالدىرۋ