ءال-فارابي اتىنداعى قازۇۋ مەن گۋميلوۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورلارى تاعايىندالدى. بۇل تۋرالى ءبىلىم جانە عىلىم مينيسترلىگىنىڭ باسپا ءسوز قىزمەتى حابارلادى.
سايت مالىمەتىنشە، 2021 جىلى 5 اقپان كۇنى "ءال-فارابي اتىنداعى قازاق ۇلتتىق ۋنيۆەرسيتەتى" كوممەرسيالىق ەمەس اكسيونەرلىك قوعامىنىڭ ديرەكتورلار كەڭەسى باسقارما ءتوراعاسى - رەكتور لاۋازىمىنا ۇمىتكەر بولعان كانديداتۋرالاردى قاراستىرعان.
اتالعان لاۋازىمعا ۇمىتكەرلەر جوو دامىتۋ باعدارلامالارىن دايىنداپ، قازۇۋ ديرەكتورلار كەڭەسىنىڭ مۇشەلەرىنە تانىستىردى. ناتيجەسىندە كونكۋرسقا قاتىسقان بىرنەشە ۇمىتكەردىڭ ىشىنەن جانار امانگەلدى قىزى تەمىربەكوۆا مەن جانسەيىت قانسەيىت ۇلى تۇيمەبايەۆتىڭ كانديداتۋراسى رەسپۋبليكالىق كوميسسيانىڭ قاراۋىنا ۇسىنىلدى.
"ق ر پرەمەر-مينيسترىنىڭ ورىنباسارى ەرالى توعجانوۆ ءتوراعالىق وتكەن رەسپۋبليكالىق كوميسسيا ديرەكتورلار كەڭەسى ۇسىنعان كانديداتتارمەن اڭگىمەلەسۋ وتكىزىپ، "ءال-فارابي اتىنداعى قازاق ۇلتتىق ۋنيۆەرسيتەتى" كوممەرسيالىق ەمەس اكسيونەرلىك قوعامىنىڭ باسقارما ءتوراعاسى – رەكتورى لاۋازىمىنا جانسەيىت قانسەيىت ۇلى تۇيمەبايەۆتى تاڭدادى" دەلىنگەن حابارلامادا.
ايتا كەتەيىك، قازۇۋ ديرەكتورلار كەڭەسىنىڭ قۇرامىنا تاۋەلسىز ديرەكتور رەتىندە راحمان الشانوۆ، كۇنسۇلۋ زاكاريا، نۇرلان سماعۇلوۆ، ەركىن تاتىشيەۆ، ارمانجان بايتاسوۆ جانە باسقا ازاماتتار كىرەدى.
ءدال سول كۇنى "ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى" كوممەرسيالىق ەمەس اكسيونەرلىك قوعامىنىڭ ديرەكتورلار كەڭەسى باسقارما ءتوراعاسى –رەكتور لاۋازىمىنا ۇمىتكەر رەتىندە كونكۋرسقا قاتىسقان بەس ازامات ازىرلەگەن ۋنيۆەرسيتەتتى دامىتۋ بويىنشا باعدارلامالارىن قاراستىردى. داۋىس بەرۋ ناتيجەسىندە رەسپۋبليكالىق كوميسسيانىڭ قاراۋىنا ساۋلە كوشكەن قىزى اماندىقوۆا مەن ەرلان باتتاش ۇلى سىدىقوۆتىڭ كانديداتۋرالارى ۇسىنىلدى.
"پرەمەر-مينيستردىڭ ورىنباسارى ەرالى توعجانوۆ ءتوراعالىق ەتكەن رەسپۋبليكالىق كوميسسيا ديرەكتورلار كەڭەسى ۇسىنعان ۇمىتكەرلەرمەن اڭگىمەلەسۋ وتكىزىپ، "ل. ن. گۋميليەۆ اتىنداعى ەۇۋ" كوممەرسيالىق ەمەس اكسيونەرلىك قوعامىنىڭ باسقارما ءتوراعاسى - رەكتورى لاۋازىمىنا ەرلان باتتاش ۇلى سىدىقوۆتى تاڭدادى" دەلىنگەن حابارلامادا.
جوو ديرەكتورلار كەڭەسىنىڭ قۇرامىنا تاۋەلسىز ديرەكتور رەتىندە مۇرات ابەنوۆ، قانات نۇروۆ، ءاليحان بايمەنوۆ، دانيار اشىمبايەۆ، الەكساندر ۆان دە پۋتت جانە باسقا دا ازاماتتار كىرەدى.
پىكىر قالدىرۋ