قازاقستاننىڭ 8 وڭىرىندە جول جابىلدى، دەپ حابارلادى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
– "قازاۆتوجول" ۇك" اق جانە "جولاۋشىلار كولىگى جانە اۆتوموبيل جولدارى باسقارماسى" مم دەرەكتەرى بويىنشا اۋا رايىنىڭ ناشارلاۋىنا بايلانىستى (كوكتايعاق، قار ارالاس جاڭبىر، جاياۋ بۇرقاسىن، شەكتەۋلى كورىنۋ) ەلىمىزدىڭ سەگىز وڭىرىندە نۇر-سۇلتان قالاسىنداعى، سولتۇستىك قازاقستان، اقمولا، قوستاناي، پاۆلودار، قاراعاندى، قىزىلوردا، شىعىس قازاقستان وبلىستارىنداعى رەسپۋبليكالىق جانە وبلىستىق ماڭىزى بار اۆتوجولداردا اۆتوكولىكتىڭ بارلىق تۇرلەرى ءۇشىن قوزعالىس جابىلدى، – دەپ حابارلادى تالعات ءۋالي.
مينيسترلىك ازاماتتاردى اۋا-رايىنىڭ وزگەرىستەرىن باقىلاۋعا شاقىرادى.
"داۋىلدى ەسكەرتۋ تۋرالى حابارلامالاردى تىڭداپ، قاجەتتى ساقتىق شارالارىن ساقتاڭىزدار. قىس ماۋسىمىندا كولىكپەن الىس جولدارعا شىقپاس بۇرىن، اۋا رايى بولجامىن مىندەتتى تۇردە زەردەلەگەن ءجون. ەگەر قاتتى بوران، بۇرقاسىن بولسا، جول كەپتەلىسىندە ۇزاق تۇرىپ قالۋىڭىز مۇمكىن. ءتىپتى جول-كولىك وقيعاسىنا دا تاپ بولۋىڭىز ىقتيمال. ەگەر قاندايدا ءبىر ەلدى مەكەنگە شۇعىل بارۋىڭىز كەرەك بولسا، دىتتەگەن جەرىڭىزگە كەدەرگىسىز جەتۋ ءۇشىن تەمىرجول كولىگىن پايدالانۋعا كەڭەس بەرەمىز" دەلىنگەن حابارلامادا.
پىكىر قالدىرۋ