2020 جىلى قازاقستاننان 29،1 مىڭ ادام كوشكەن. بۇل 2019 جىلعى كورسەتكىشپەن سالىستىرعاندا 35،6 پايىزعا تومەن. ال قازاقستانعا قونىس اۋدارعاندار سانى 2020 جىلى 11،4 مىڭ ادامدى قۇراعان، دەپ حابارلادى LS سايتى.
قازاقستاننان كوشۋشىلەردىڭ باسىم كوپشىلىگى (25 139 ادام) رەسەيگە كەتكەن. بەستىكتە گەرمانيا (2250)، اقش (247)، بەلارۋس (234)، وزبەكستان (199) جانە كانادا (111) بار.
قازاقستانعا قونىس اۋدارۋشىلار كوشىن دە رەسەي (3614 ادام) باستاپ تۇر. ودان كەيىنگى ورىنداردا وزبەكستان، (2595)، جۇڭگو (1560)، تۇركىمەنستان (1192)، قىرعىزستان (465) جانە تۇركيا (312) جايعاسقان.
ەلدەن كەتكەندەردىڭ اراسىندا بىلتىر قاراعاندى وبلىسىنىڭ تۇرعىندارى كوپ بولعان. ورتالىق قازاقستاننان 4106 ادام كوشىپ كەتكەن. شقو-دان – 3868، قوستاناي وبلىسىنان – 3347، پاۆلودار وبلىسىنان – 3170، الماتى قالاسىنان – 2654 ازامات قونىس اۋدارعان.
ەلگە كەلۋشىلەر نەگىزىنەن الماتى وبلىسىنا (2710)، تۇركىستان (1711)، قوستاناي (1097)، قىزىلوردا (850) اقتوبە وبلىستارىنا (805) قونىستانعان.
كوشكەندەر اراسىندا 4471 تەحنيكالىق مامان، 2332 ەكونوميست، 1454 پەداگوگ، 759 مەديسينا قىزمەتكەرى، 541 زاڭگەر، 447 ارحيتەكتور-قۇرىلىسشى، 230 اۋىلشارۋاشىلىق مامانى بار. 5365 ادام وزگە ماماندىقتاردى مەڭگەرگەن.
قازاقستاننان كەتكەندەردىڭ 20 313ء-ى ورىس، 2481ء-ى نەمىس، 2097ء-ى ۋكراين، 1311ء-ى قازاق، 807ء-ى تاتار جانە تاعى باسقا ۇلتتار.
پىكىر قالدىرۋ