رەسەي سىرتقى ىستەر ءمينيسترى سەرگەي لاۆروۆ ماسكەۋ ەۋروپالىق وداق ەل ەكونوميكاسىنا ءقاۋىپ توندىرەتىن سانكسيا جاريالاسا، وداقپەن قارىم-قاتىناستى ۇزۋگە دايىن ەكەنىن حابارلادى، دەپ جازادى ريا نوۆوستي.
– ءبىز بارلىق جاعدايعا دايىنبىز. ەگەر ەۋرووداق ەكونوميكامىزعا زالال كەلتىرەتىن بولسا، ونىڭ ىشىندە ءالسىز سالالارعا ءقاۋىپ توندىرەتىن سانكسيا سالسا، وندا ءبىز ول قادامعا (وداقپەن قارىم-قاتىناستى ۇزۋگە) دايىنبىز. الەمنەن وقشاۋلاناتىن ءبىز ەمەس، ءبىراق كەز كەلگەن جاعدايعا دايىن بولۋىمىز كەرەك. "بەيبىتشىلىك قالاساڭ، بەيبىتشىلىك، سوعىس بولسا، سوعىس"، دەدى لاۆروۆ "سولوۆيەۆ Live" YouTube-ارناسىندا.
ەۋروپالىق ديپلومات جوزەپ بوررەل وتكەن اپتادا ماسكەۋگە جاساعان ساپارىندا رەسەيگە قارسى جاڭا سانكسيا تۋرالى ءسوز قوزعاعان. ونىڭ ايتۋىنشا، ماسەلە 22 اقپاندا وداققا مۇشە ەلدەردىڭ سىرتقى ىستەر ءمينيسترى كەڭەسىنىڭ وتىرىسىندا، سوسىن ناۋرىزدا بىرلەستىك سامميتىندە قارالادى.
بۇعان دەيىن ەۋروپارلامەنت الەكسەي ناۆالنىيدىڭ ءىسى بويىنشا سوت شەشىمىن، سونداي-اق ونىڭ جاقتاستارىنىڭ قامالۋىن سىنعا العان.
پىكىر قالدىرۋ