"قتج" ۇك" اق بالقاش جول ديستانسياسىنىڭ باسشىسى ۇستالدى، دەپ حابارلادى باس كولىك پروكۋراتۋراسىنىڭ باسپا ءسوز قىزمەتى.
"باس كولىك پروكۋراتۋراسى جانە نۇر-سۇلتان قالاسى بويىنشا ەكونوميكالىق تەرگەۋ دەپارتامەنتىنىڭ بىرلەسكەن ءىس-شارالارى ناتيجەسىندە "قتج" ۇك" اق فيليالىنىڭ لاۋازىمدى تۇلعالارىنىڭ زاڭعا قايشى ارەكەتتەرى انىقتالدى.
اعىمداعى جىلعى 10 اقپاندا "قتج" ۇك" اق فيليالىنىڭ بالقاش جول ديستانسياسىنىڭ باستىعى ت. ەسىمدى ازامات ۇستالىپ، كەيىن سوت سانكسياسىمەن 2 ايعا قاماۋعا الىندى" دەلىنگەن حابارلامادا.
الدىن الا تەرگەۋ بويىنشا، ول تەرگەۋ بارىسىندا انىقتالعان لاۋازىمدى تۇلعالارمەن بىرگە تەمىر جول توسەمىنە كۇردەلى جوندەۋ جۇمىستارىنىڭ جەكەلەگەن تۇرلەرىن ورىنداماۋ ارقىلى بيۋدجەت قاراجاتىن جىمقىرعان. جالپى شىعىن 92 ملن. تەڭگەدەن استامدى قۇرايدى.
حابارلامادا سوتقا دەيىنگى تەرگەۋ امالدارى جۇرگىزىلىپ جاتقانى جانە وزگە اقپارات تەرگەۋ مۇددەسىنە ساي جاريا ەتىلمەيتىنى ايتىلعان.
پىكىر قالدىرۋ