الماتى وبلىسىنداعى ەڭ ۇلكەن ءارى حالىق ەڭ تىعىز ورنالاسقان ەڭبەكشىقازاق اۋدانىنىڭ اكىمى قۋانىشبەك قاشقىمبايەۆ ءوز ەركىمەن قىزمەتىنەن كەتەتىنىن مالىمدەدى. ول بۇل قىزمەتتە 7 اي عانا بولعان.

"قۇرمەتتى اۋدان تۇرعىندارى، مەنىڭ وقىرماندارىم! مەن، قۋانىشبەك قالي ۇلى ەڭبەكشىقازاق اۋدانىنىڭ اكىمى قىزمەتىن ءوز ەركىممەن بوساتتىم! وسى قىسقا ۋاقىت ارالىعىندا تاريحى باي ولكەدە ەڭبەك ەتكەنىمە، اۋدان تۇرعىندارىنىڭ تۇيتكىلدى ماسەلەلەرىن كىشكەنە بولسادا شەشۋگە كومەكتەسكەنىم ءۇشىن قۋانىشتىمىن! الداعى ۋاقىتتادا اۋدان اكىمىنىڭ ورنىنا بىلىكتى باسشى كەلەتىنىنە سەنىمدىمىن. 7 اي ۋاقىت بويى بىرگە جۇمىس اتقارعان ارىپتەستەرىمە، اۋدان تۇرعىندارىنا ۇلكەن العىسىمدى ايتقىم كەلەدى! ەسكەرە كەتۋ كەرەك مەن وسى لاۋازىمدىق قىزمەتتى 2020 جىلدىڭ 2 شىلدەسىنەن باستاپ اتقارعان بولاتىنمىن!" دەلىنگەن اۋدان اكىمىنىڭ جەلىدەگى پاراقشاسىندا.

ەڭبەكشىقازاق اۋدانى اكىمىنىڭ باسپا ءسوز قىزمەتى رەسمي حابارلاماداعى اقپاراتتان وزگە ەشتەڭە ايتپادى.

قۋانىشبەك قاشقىمبايەۆ 1962 جىلى تۋعان. ۆ.ي.لەنين اتىنداعى قازاق پوليتەحنيكالىق ينستيتۋتىن، ماسكەۋ مەملەكەتتىك الەۋمەتتىك ۋنيۆەرسيتەتىن بىتىرگەن. ماماندىعى بويىنشا تاۋ-كەن ينجەنەرى-ەلەكتريك، زاڭگەر.

قۋانىشبەك قاشقىمبايەۆ بۇعان دەيىن اماتى قالاسىنىڭ جەر قاتىناستارى باسقارماسىنىڭ باستىعى، الماتى قالاسى ناۋرىزباي اۋدانىنىڭ اكىمى، الماتى قالاسىنىڭ اۋىل شارۋاشىلىعى جانە ۆەتەريناريا باسقارماسىنىڭ باسشىسى بولىپ جۇمىس ىستەگەن.