قازاقستان سىرتقى ىستەر مينيسترلىگىنىڭ باسپا ءسوز حاتشىسى ايبەك سمادياروۆ ەۋروپا پارلامەنتىنىڭ قازاقستانداعى ساياسي جاعدايدى سىناعان "قارارى تۇسىنبەستىك تۋدىراتىنىن" ايتادى، دەپ حابارلادى قازاقپارات.

ونىڭ ايتۋىنشا، مۇنداي قارارلاردى ەۋروپالىق پارلامەنت حالىقارالىق كۇن ءتارتىبىنىڭ ءتۇرلى ماسەلەلەرى بويىنشا ايتارلىقتاي تۇراقتى تۇردە قابىلدايدى.

ايبەك سمادياروۆ ەۋروپالىق وداققا مۇشە مەملەكەتتەر پرەزيدەنتى قاسىم-جومارت توقايەۆتىڭ باستاماسىمەن قولعا الىنعان دەموكراتيالىق رەفورمالاردى قولدايتىنىن العا تارتادى.

– وسى سەبەپتى جاڭا قاراردىڭ ماتىنىندە پايدالانىلعان مالىمەتتەردىڭ ناقتىلىعىنا قاتىستى قازاقستاندا تۇسىنبەستىك تۋىندادى. ەۋروپارلامەنتتىڭ ءبىرقاتار مۇشەلەرى ەلىمىزدىڭ دامۋىنداعى وزەكتى ۇردىستەرگە قاتىستى وڭ پىكىرلەرىنە قاراماستان، وزدەرىنىڭ پارتيالارىنداعى ىشكى تارتىبىنە سايكەس وسى قاراردى قابىلداۋعا داۋىس بەردى. سونىمەن قاتار وبەكتيۆتى كوزقاراستاعى ءبىرقاتار ەۋرودەپۋتاتتار، اتاپ ايتقاندا ماكسيميلليان كرا (گەرمانيا)، تەرري مارياني (فرانسيا) جانە تاتيانا جدانوكا (لاتۆيا) قازاقستاندى بەلسەندى قورعادى، – دەدى ول.

بۇعان دەيىن ازاتتىق راديوسى 11 اقپاندا ەۋروپا پارلامەنتى باسىم كوپشىلىك داۋىسپەن "قازاقستانداعى ادام قۇقىقتارىنا جونىندەگى" قارار قابىلداعانىن حابارلاعان. ەلدەگى ازاماتتىق قوعام اياسىنىڭ تارىلۋىن، ادام قۇقىقتارىنىڭ بۇزىلۋىن جانە سايلاۋداعى ادىلەتسىزدىكتى سىنايتىن قاراردى داۋىس بەرگەن 693 دەپۋتاتتىڭ 598ء-ى قولداسا، تەك 43 دەپۋتات قارسى شىققان.

قازاقستانداعى باسەكەسىز سايلاۋ جانە بەلسەندىلەردى قۋدالاۋ، ساياسي تۇتقىندار، تۇرمەدە ازاپتاۋ، ءسوز بوستاندىعى ماسەلەلەرىنە نازار اۋدارعان ەۋرو پارلامەنت دەپۋتاتتارى قازاقستانعا 20 تالاپ قويعان.

وندا ادامداردىڭ نەگىزگى بوستاندىقتارىن قۇرمەتتەۋ، ساياسي ومىرگە قاتىسۋ، ساياسي پليۋراليزم، سايلاۋ كوميسسيالارىنىڭ بەيتاراپتىعى، سايلاۋ جانە سايلانۋ قۇقىقتارى، سايلاۋ ناتيجەسىن جاريالاۋ ماسەلەلەرى الدىمەن ايتىلادى. مۇنىمەن بىرگە دەپۋتاتتار "قۇقىق قورعاۋشى بەلسەندىلەردى، ءدىني ۇيىمداردى، ازاماتتىق قوعام ۇيىمدارى مەن كاسىپوداقتاردى، جۋرناليستەر مەن ساياسي وپپوزيسيالىق قوزعالىستاردى ساياسي سەبەپپەن قۋدالاۋدى توقتاتىپ، جۇرتتىڭ ساياسي، ءدىني جانە باسقا دا كوزقاراستارىن ەركىن بىلدىرۋىنە جاعداي جاساۋعا، ەركىندىكتى قامتاماسىز ەتۋ ءۇشىن بەيبىت جيىندار تۋرالى زاڭدارعا وزگەرىس ەنگىزۋگە" جانە ساياسي تۇتقىنداردى دەرەۋ بوساتۋعا شاقىرادى. 

بۇعان قوسا دەپۋتاتتار ايەلدەرگە جاسالاتىن زورلىقپەن ءتيىمدى تۇردە كۇرەسۋگە، ول ءۇشىن زاڭدى كۇشەيتىپ، جاپا شەگۋشىلەردىڭ بۇل تۋرالى جەدەل حابارلاۋىنا مۇمكىندىك بەرەتىن مەحانيزمدەردى قالىپتاستىرۋعا ۇندەيدى. سونىمەن بىرگە دەپۋتاتتار قازاقستان ۇكىمەتىن لگبت قاۋىمداستىعىنىڭ قۇقىقتارىن تولىق قورعاۋدى، ولاردى كەمسىتپەۋگە تولىق كەپىلدىك بەرۋدى تالاپ ەتتى. قاراردا ەۋروپارلامەنت قىتايدىڭ شىڭجاڭ اۋدانىندا قايتا ۇيرەنۋ لاگەرلەرىنەن قاشىپ كەلگەن قازاقتار مەن باسقا دا ازشىلىق وكىلدەرىنىڭ "قاۋىپسىزدىگىن قامتاماسىز ەتۋگە" شاقىردى.