دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى كوروناۆيرۋستىڭ پايدا بولۋىنا قاتىستى دەرەكتەردى جۇڭگو بيلىگى جاسىرىن ۇستاپ وتىرعانىن ايتادى. بۇل تۋرالى ۋحانعا بارعان مامانداردىڭ ءبىرى The Wall Street Journal باسىلىمىنا بەرگەن سۇحباتىندا مالىمدەدى.
عالىمنىڭ ايتۋىنشا، جۇڭگو بيلىگى كوروناۆيرۋس جۇقتىرۋدىڭ العاشقى 179 دەرەگى جايلى مالىمەتتەردى ۇسىنۋدان باس تارتىپ، كەرىسىنشە وزدەرى جاساعان تالداۋ جۇمىستارىنىڭ ناتيجەسىن كورسەتكەن.
ددسۇ-نا مۇشە ەلدەر كەز كەلگەن اۋرۋ بويىنشا باستاپقى اقپاراتپەن بولىسۋگە ءتيىس. ازىرگە اتالعان جاعداي تۋرالى جۇڭگو بيلىگى پىكىر بىلدىرمەي وتىر.
جۋىردا ءۇندىستاننىڭ WION تەلەارناسى ددسۇ شەنەۋنىكتەرى "كوروناۆيرۋس تۋرالى اقپاراتپەن بولىسپەگەنى ءۇشىن قىتايدى ايىپتادى دەلىنگەن قۇپيا اۋديوجازبانى جاريالاعان.
تاسپادا داۋسى دوكتور مايك رايانعا ۇقسايتىن ادام جۇڭگو اقپاراتتى جاسىرىپ، ۆيرۋستىڭ بۇكىل الەمگە تارالۋىنا مۇمكىندىك بەرگەنىن ايتىپ، ايىپتايدى جانە پاندەميانى 2003 جىلعى SARS ەپيدەمياسىمەن سالىستىرادى.
اۋديودان راياندىكىنە وتە ۇقساس داۋىستىڭ "بۇل ءدال وسى سەناريي" دەگەن ءسوزى ەستىلەدى. سونداي-اق اۋديوداعى داۋىس قىتايلىق دارىگەرلەردى ايىپتايدى، سەبەبى، ول كەزدە جۇڭگو دارىگەرلەرى "كوروناۆيرۋستىڭ ادامنان ادامعا جۇعۋى تۋرالى ناقتى دالەلدەر جوق" دەپ جاريالاعان.
پىكىر قالدىرۋ