تۇركىستان وبلىسىنىڭ پوليسەيلەرى قارۋ قولدانىپ، بۇزاقىلىق جاساعان كۇدىكتىلەردى ۇستادى، دەپ حابارلادى وبلىستىق پوليسيا دەپارتامەنتىنىڭ باسپا ءسوز قىزمەتى.
قازىعۇرت اۋداندىق پوليسيا بولىمشەسىنىڭ كەزەكشى بولىمىنە ۋچاسكەلىك ينسپەكتورلاردان بوس جايىلىمداردىڭ بىرىندە بولعان كەزەكتى كوكپاردى توقتاتۋ كەزىندە بەلگىسىز تۇلعالاردىڭ تاراپىنان قارۋ قولدانۋ ارقىلى بۇزاقىلىق بولعانى بويىنشا حابارلاما كەلىپ ءتۇستى. اتالعان جايتتى قازىعۇرت پوليسەيلەرى قىلمىستىق كودەكستىڭ 293-بابى 3-بولىگى "بۇزاقىلىق" بويىنشا سدتبت-عا تىركەپ، جەدەل-ىزدەستىرۋ ءىس-شارالارىنا كىرىستى.
"جەدەل جۇرگىزىلگەن ارنايى وپەراسيا ناتيجەسىندە تۇركىستان وبلىسى پوليسيا دەپارتامەنتى كريمينالدىق پوليسيا باسقارماسىنىڭ قىزمەتكەرلەرى تۇركىستان وبلىسى ۇقكد جانە ۇلتتىق ۇلاننىڭ "بۇركىت" ارنايى جاساعىمەن بىرلەسىپ، قازىعۇرت كەنتى كوشەلەرىنىڭ بىرىندە "ۆاز" ماركالى اۆتوكولىكتى توقتاتىپ، 4 كۇدىكتىنى ۇستادى. ۇستالعان قازىعۇرت اۋدانىنىڭ 4 جاس تۇرعىنى پوليسيا بولىمىنە جەتكىزىلدى" دەلىنگەن حابارلامادا.
دەپارتامەنت مالىمەتىنشە، كۇدىكتىلەردى ءتىنتۋ كەزىندە پوليسەيلەر سومكەنى تاۋىپ الىپ، ودان زاتتاي دالەل رەتىندە 16 كاليبرلى شولاق مىلتىق پەن وق-دارىلەردى تاركىلەگەن. جەدەل ۋاكىلدەر كۇدىكتىلەردىڭ ءۇيىن ودان ءارى ءتىنتۋ كەزىندە قوسىمشا 16 كاليبرلى اڭشىلىق مىلتىق پەن ەكى تراۆماتيكالىق تاپانشانى تاپتى.
"قازىرگى ۋاقىتتا اتالعان جايت بويىنشا قىلمىستىق كودەكستىڭ 293-باپ "بۇزاقىلىق" جانە 287-باپ "قارۋدى، وق-دارىلەردى، جارىلعىش زاتتار مەن جارىلعىش قۇرىلعىلاردى زاڭسىز ساتىپ الۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ" بويىنشا سوتقا دەيىنگى تەرگەۋ امالدارى جۇرگىزىلىپ جاتىر. جاستار قاماۋعا الىندى. پوليسيا قىزمەتكەرلەرى كۇدىكتىلەردىڭ باسقا دا قىلمىستارعا قاتىستىلىعىن تەكسەرىپ، قارۋدىڭ قايدان الىنعانىن انىقتاپ جاتىر" دەلىنگەن حابارلامادا.
پىكىر قالدىرۋ