ءبىلىم جانە عىلىم مينيسترلىگى ساپاسىز ءبىلىم بەرەتىن جوعارى وقۋ ورىندارىنىڭ سانىن قىسقارتۋ بويىنشا جۇمىستى جالعاستىرىپ جاتىر. بارلىق تەكسەرۋ قاتاڭ تۇردە قولدانىستاعى زاڭناماعا سايكەس جۇزەگە اسىرىلۋدا. تالاپتار بويىنشا جوعارى وقۋ ورىندارى انىقتالعان بۇزۋشىلىقتاردى بەرىلگەن ۋاقىت ىشىندە جويۋعا ءتيىس. بۇل تۋرالى مينيسترلىكتىڭ باسپا ءسوز قىزمەتى.
ماسەلەن، وتكەن جىلى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى قازاق مەديسينالىق ۇزدىكسىز ءبىلىم بەرۋ ۋنيۆەرسيتەتىنىڭ ءبىلىم بەرۋ قىزمەتىنە تەكسەرۋ جۇرگىزىپ، ناتيجەسىندە ورەسكەل بۇزۋشىلىقتار انىقتادى.
اتاپ ايتقاندا، جوعارى وقۋ ورنىنداعى باكالاۆريات، ماگيستراتۋرا، دوكتورانتۋرا، رەزيدەنتۋرا باعدارلاماسى بويىنشا وقۋ ءۇردىسى قاجەتتى پروفەسسورلىق-وقىتۋشىلىق قۇراممەن جانە ءتيىستى ماتەريالدىق-تەحنيكالىق بازامەن قامتاماسىز ەتىلمەگەن. سونىمەن قاتار وقۋ ورنىنداعى وزگە دە ماڭىزدى كورسەتكىشتەر بەلگىلەنگەن ەڭ تومەنگى نورمالارعا سايكەس كەلمەيدى.
2020 جىلعى شىلدە ايىنداعى تەكسەرىس ناتيجەلەرى بويىنشا اتالعان ۋنيۆەرسيتەت ليسەنزياسىنىڭ كۇشى توقتاتىلىپ، انىقتالعان بۇزۋشىلىقتاردى جويۋعا ۋاقىت بەرىلگەن. الايدا، قايتا تەكسەرىس جۇرگىزۋ كەزىندە قازاق مەديسينالىق ۇزدىكسىز ءبىلىم بەرۋ ۋنيۆەرسيتەتى كوميتەتتىڭ نۇسقامالارىن ورىنداماعانى جانە زاڭنامانى ورەسكەل بۇزا وتىرىپ، جۇمىسىن جالعاستىرعانى بەلگىلى بولدى.
– بولاشاق دارىگەرلەرگە ساپالى ءبىلىم بەرۋ – ادامداردىڭ ءومىرى مەن دەنساۋلىعىنىڭ كەپىلى. وسى ورايدا ءبىز سوتقا جۇگىنۋگە ءماجبۇر بولدىق. قازاق مەديسينالىق ۇزدىكسىز ءبىلىم بەرۋ ۋنيۆەرسيتەتىن جابۋ ماسەلەسىن سوت تا، ءبىلىم جانە عىلىم مينيسترلىگىنىڭ كوميتەتى تە قارادى. الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ قاۋلىسىنا سايكەس قازاق مەديسينالىق ۇزدىكسىز ءبىلىم بەرۋ ۋنيۆەرسيتەتى اكىمشىلىك جاۋاپكەرشىلىككە تارتىلدى. ودان بولەك، جوو-عا ايىپپۇل سالىنىپ، باس ليسەنزيادان ايىرۋ تۋرالى شەشىم شىعارىلدى، – دەدى ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
قازاق مەديسينالىق ۇزدىكسىز ءبىلىم بەرۋ ۋنيۆەرسيتەتى الماتىداعى دارىگەرلەردىڭ بىلىكتىلىگىن جەتىلدىرۋ ۇيىمىنىڭ بازاسىندا 2015 جىلى قۇرىلعان. بۇگىنگى تاڭدا اتالعان وقۋ ورنىندا 3 مىڭنان استام ستۋدەنت وقيدى.
مينيسترلىك ليسەنزياسى تارتىپ الىنعان وقۋ ورنىندا وقيتىن ستۋدەنتتەردىڭ گرانتتارى ساقتالاتىنىن جانە ولار باسقا جوعارى وقۋ ورىندارىنا اۋىستىرىلاتىنىن حابارلادى. سونداي-اق وقۋ قۇنى وزگەرمەيتىنىن، وقىتۋشىلاردى جۇمىسقا ورنالاستىرۋ ماسەلەسى جەكە قاراستىرىلىپ جاتقانىن جەتكىزدى.
پىكىر قالدىرۋ