بۇل تۋرالى دەپۋتات ەرلان سايروۆ پارلامەنت ءماجىلىسىنىڭ جالپى وتىرىسىندا پرەمەر-مينيستر اسقار ءماميننىڭ اتىنا جولداعان ساۋالىندا ايتتى.

– رەسمي دەرەكتەر قازاقستاندا كۇنكورىس دەڭگەيى تومەن ازاماتتاردىڭ سانى 1 ملن 65 مىڭ ادامنان اسقاندىعىن كورسەتەدى. وتكەن جىلمەن سالىستىرعاندا، كەدەيلىك دەڭگەيى 21 پايىزعا ءوسىپ وتىر. حالىقتىڭ كەدەيلىگى – ۇلتتىق قاۋىپسىزدىككە تىكەلەي كەرى اسەر ەتەتىن باستى پروبلەما. اسا وزەكتى ماسەلە – اۋىلداعى كەدەيلىك. Nur Otan الەۋمەتتىك مۇقتاج ادامدار ماسەلەسىن ەكونوميكالىق تۇرعىدا شەشۋ ماڭىزدى دەپ ەسەپتەيدى. ونى شەشۋدىڭ وڭتايلى ءادىسى – ءال-اۋقاتى تومەن ازاماتتاردى ميكروكرەديتپەن قامتاماسىز ەتە وتىرىپ، ادامداردىڭ بيزنەس ساۋاتىن ارتتىرۋ. 

پرەزيدەنت توقايەۆ ۇكىمەتكە بەرگەن تاپسىرماسىندا ميكروكرەديت پروبلەماسىنا باسا نازار اۋداردى. ەندى ماسەلە: "ۇكىمەت قالاي شەشەدى؟" دەگەن سۇراق تۋادى.  

"ەڭبەك" باعدارلاماسىنىڭ نەسيەلەندىرۋ باعىتى بويىنشا 2020 جىلى اۋىل تۇرعىندارىنا 43،3 ملرد تەڭگەگە 11 294 نەسيە بەرىلدى. وسى باعدارلاما اياسىنداعى بيىلدىڭ بيۋدجەتى 20 ملرد تەڭگەنى عانا قۇراپ وتىر، ياعني بيىل شاعىن نەسيە الۋشىلاردىڭ سانى 5 200-گە ازايادى، – دەدى ە. سايروۆ.

ونىڭ ايتۋىنشا، پاندەميا كەزىندە، ۇلتتىق ەكونوميكا جانە ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ كەرى پوزيسياسى بىزگە تۇسىنىكسىز. ميكروكرەديتتەۋدەگى باستى پروبلەما – كەپىلزات ماسەلەسى. بۇل پروبلەمانى نەسيەگە كەپىلدىك بەرۋ مەحانيزمىن ەنگىزۋ ارقىلى ناقتى شەشەتىن ۋاقىت جەتتى.

– بيىل اتامەكەن جانە جەرگىلىكتى اكىمدىكتەردىڭ قاتىسۋىمەن شاعىن نەسيە ۇيىمدارىن اشۋ جوسپارلانىپ وتىر. نيەت دۇرىس، ءبىراق ءوزىنىڭ تيىمدىلىگىن كورسەتە بىلگەن، وڭتايلى جۇمىس ىستەپ تۇرعان، 10 جىل شاعىن نەسيە بەرۋ تاجىريبەسى بار اۋىلشارۋاشىلىعىن قارجىلاي قولداۋ قورى نە سەبەپتى جابىلماق؟ مەملەكەت قاراپايىم حالىق مۇددەسى تۇرعىسىنان قوردى ساقتاۋ قاجەت. ويتكەنى وزدەرى قينالىپ وتىرعان اۋىلداعى ۇساق شارۋالار مەن ءزارۋ ادامدار قارجى كوزىنەن مۇلدەم قاعىلۋ ءقاۋپى باسىم. اۋىلدا ميكرو-بيزنەستى دامىتۋدىڭ باستى اسپەكتىسى – تۇتىنۋ جانە قىزمەت كورسەتۋ كووپەراتيۆتەرىن قۇرۋ. حالىقارالىق تاجىريبەدە بۇل كووپەراتيۆتەر ءونىمدى وڭدەۋ، وتكىزۋگە كومەكتەسۋ، ۆەتەريناريا، مال ازىعىن دايىنداۋ، وزىق ءبىلىم تاراتۋمەن اينالىسادى. وسىنداي كووپەراتيۆتەردى، اسىرەسە، شالعاي ەلدى مەكەندەردە قۇرۋ وتە وزەكتى، – دەدى دەپۋتات.

دەپۋتات شالعاي ەلدى مەكەندەرگە ارزانداتىلعان ميكرونەسيە جەتكىزۋدىڭ دە ينفروقۇرىلىمىن جاساۋ ماڭىزدى ەكەنىن ايتتى. 

– بانكتەر مەن ميكروكرەديتتەۋ ۇيىمدارى قالا جانىنداعى ەلدى مەكەندەردى عانا قامتيدى. الىستاعى اۋىل ارزان نەسيەگە ءزارۋ، جەتكىزەتىن امال جوقتىڭ قاسى. بۇل جونىندە دە پرەزيدەنت توقايەۆ بىرنەشە ايماقتا "ەگىستىكتەن سورەگە دەيىن كووپەراسيالىق تىزبەك" جاساۋ جونىندە ناقتى تاپسىرما بەرگەن. وسى باستاما بويىنشا 2 ملن اۋىل تۇرعىنىنىڭ كىرىسىن ءوسىرۋ قاراستىرىلعان. بۇگىندە بۇل تاپسىرما فورمالدى ورىندالدى، قارجى كوزى ءزارۋ ادامدارعا جەتپەدى دەگەن پىكىر بار. اۋىلشارۋاشىلىعى مينيسترلىگى وسى باستاما بويىنشا قانشا ءزارۋ ادامعا ناقتى كومەك كورسەتىلگەنى جونىندە ەسەپ بەرگەنى ابزال، – دەدى ول.