تۇركىمەنستاندا ءىىم جوعارى وقۋ ورنىنىڭ كۋرسانتىنا جەڭىلۋدەن باس تارتقانى ءۇشىن 14 جاستاعى دزيۋدوشى سۇلەيمەن تۇرسىنبايەۆتى جارىستان كەيىن ساباپ كەتكەن. جاس سپورتشى العان جاراقاتىنىڭ سالدارىنان كوز جۇمدى، دەپ حابارلادى turkmen.news.

اقپان ايىنىڭ باسىندا احال وبلىسىنىڭ باحاردەن اۋدانىندا دزيۋدودان تۋرنير بولعان. فينالدىق جەكپە-جەك الدىندا سۇلەيمەنگە قارسىلاسىنان جەڭىلۋدى ۇسىنعان، ءبىراق ول باس تارتىپ، لايىقتى تۇردە چەمپيون اتانعان.

جارىس اياقتالعاننان كەيىن، سپورتتىق فورماداعى بەلگىسىز جاستار جاس چەمپيوننىڭ جاتتىقتىرۋشىسىنا شابۋىل جاساپ، ونى اياۋسىز ۇرىپ-سوعىپ، جەڭىمپاز جىگىتتى بەلگىسىز باعىتقا الىپ كەتكەن. ارتىنشا ءجاسوسپىرىمدى دە اياۋسىز ۇرىپ-سوعىپ، كوشەگە ءولىمشى كۇيدە تاستاپ كەتكەن.

سپورتشىنى ەسسىز جاتقان جەردەن كەزدەيسوق ءوتىپ بارا جاتقان ادامدار كورىپ، جەدەل جاردەم شاقىرعان. ءجاسوسپىرىمدى اشحابادتاعى اۋرۋحانالاردىڭ بىرىنە اپارعان، ءبىراق دارىگەرلەر سۇلەيمەنگە كومەك كورسەتۋدەن باس تارتقان. ونى تۇرعىلىقتى جەرىندەگى اۋرۋحاناعا، 500 شاقىرىمداعى داشوگۋز ۆەلاياتىنىڭ كۋنياۋرگەنچسكيي ەتراپىنا اپارۋعا كەڭەس بەرەدى. سپورتشىنى ەل استاناسىنان الىپ، اۋداندىق اۋرۋحاناعا جەتكىزگەن. بالانى وسىلاي ارى-بەرى سۇيرەپ جۇرگەندە جاراقاتى اسقىنىپ،  سپورتشى بىرنەشە كۇننەن كەيىن كوز جۇمدى.

قايعىعا باتقان اتا-اناسى زيادا حودجاكوۆا مەن ماتياكۋب تۇرسىنبايەۆ تۇرىكمەنستان پرەزيدەنتى گۋربانگۋلى بەردىمۇحامەدوۆقا ۇندەۋ جولداپ، كىنالىلەردى زاڭ بويىنشا ادىلەتتى جازالاۋدى تالاپ ەتۋدە.

سپورتشىنىڭ كوزى ءتىرى كەزىندە تۇسىرىلگەن قىسقا بەينەماتەريالداردا اۋرۋحانانىڭ توسەگى قانعا بويالعانىن كورۋگە بولادى.

سۇلەيمان تۇرسىنبايەۆ تۋرالى ماتەريال جاريالانعاننان كەيىن Turkmen.news سايتىنىڭ رەداكسياسىنا جاس قىرشىننىڭ قارسىلاسى مەملەكەت باسشىسىنىڭ ۇلى سەردار بەردىمۇحامەدوۆ ايەلىنىڭ تۋىسى ەكەنى تۋرالى جاسىرىن حابارلاما كەلگەن.

“ءبىز بۇل اقپاراتتى راستاي دا، تەرىسكە شىعارا دا المايمىز. ءدال سول دەرەككوز پروكۋراتۋراعا كىسى ءولتىرۋدى تەرگەمەۋ تۋرالى نۇسقاۋ بەرىلگەنىن ايتتى، ويتكەنى سۇلەيمان ءساتسىز قۇلاپ، وعان ەشنارسە بولعان جوق ەكەن” دەپ جازدى باسىلىم.