ءبىلىم جانە عىلىم ءمينيسترى اسحات ايماعامبەتوۆ قازاق تەليەۆيزياسىنىڭ ارداگەرى نۇرتىلەۋ يمانعالي ۇلىنىڭ ومىردەن وتۋىنە بايلانىستى وتباسى مەن تۋىسقاندارىنا كوڭىل ايتتى.
– نۇرتىلەۋ يمانعالي ۇلى ومىردەن ءوتتى دەگەن سۋىت حابار ەستىدىك… سانالى عۇمىرىن قازاق جۋرناليستيكاسىنا ارناعان اعامىزبەن وسى جازدا جاڭا وقۋ جىلىنىڭ قارساڭىندا اشىق-جارقىن اڭگىمەلەسكەن بولاتىنبىز. سۇحباتتىڭ سوڭىندا ريزاشىلىعىن بىلدىرگەن اعامىز، “قايدا جۇرسەڭىز دە، اسىعىڭىز الشىسىنان ءتۇسسىن” دەپ ماعان دا اق باتاسىن بەرگەن ەدى.
“سالماقتى ءسوز ۇيىرسە اسىقتاي عىپ، بار-جوعى 40 مينۋت، اسىقپايىق“ دەپ باعدارلاما بارىسىندا وزەكتى تاقىرىپتاردى قوزعاپ، ماڭىزدى ماسەلەلەردى جان-جاقتى تالداپ، حالىقتىڭ كوكەيىندە جۇرگەن ساۋالداردى كوتەرۋشى ەدى.
نۇرتىلەۋ يمانعالي ۇلىنىڭ تۋعان-تۋىس، جاقىندارىنا كوڭىل ايتامىن. قايعىلارىڭىزعا ورتاقپىن. باقۇل بولىڭىز، اعا!، – دەپ كوڭىل ايتتى مينيستر الەۋمەتتىك جەلىدەگى پاراقشاسىندا.
بۇعان دەيىن پرەزيدەنت قاسىم-جومارت توقايەۆ پەن ەلباسى نۇرسۇلتان نازاربايەۆ بەلگىلى تەلەجۇرگىزۋشى نۇرتىلەۋ يمانعالي ۇلىنىڭ وتباسىنا كوڭىل ايتۋ جەدەلحاتىن جولداعان بولاتىن.
پىكىر قالدىرۋ