ونسىز دا كولىك تىعىنان كوز اشپايتىن "التىن وردا" بازارىنىڭ جانىنداعى اينالما كوپىر قۇرىلىسىنىڭ سوزىلعانىنا ءۇش جىلدان استى. بۇگىن قالا اكىمى باقىتجان ساعىنتايەۆتىڭ تۇرعىندارمەن ەسەپتىك كەزدەسۋىندە اتالمىش جول ماسەلەسى تاعى دا ءسوز بولدى.
كوپىر سالىنادى دەگەندە قالا تۇرعىندارى قاتتى قۋانعان بولاتىن. ويتكەنى قالاعا تاڭەرتەڭ جانە كەشكى ۋاقىتتا كىرىپ شىعاتىن كولىكتەر وسى ۋاقىتتا ساعاتتاپ كولىك تىعىنىنا تاپ بولادى. بۇل ماسەلەنىڭ ءوزىن دە شارشاتقانىن ايتقان قالا اكىمى "ءبىز Instagram-دا جاسالعان جۇمىس تۋرالى ەسەپتى جاريالاعان كەزدە، پىكىرلەردە "التىن ورداداعى اينالما كوپىر قاشان اياقتالادى؟" دەگەن سۇراق ءجيى قويىلادى. وكىنىشكە وراي، بۇل اۋماق قالاعا ەمەس، وبلىسقا تيەسىلى. مەن دە، اينالما جولدىڭ قاي ۋاقىتتا اياقتالعانىن سۇراپ شارشادىم. ونداعى جۇمىستار مينيسترلىكتىڭ قاداعالاۋىمەن مەردىگەرلەرمەن جۇزەگە اسىرىلادى. اقشا جەتكىلىكتى، ءبىراق مەردىگەرلەر بۇل قاراجاتتى يگەرە الماعان بولۋى مۇمكىن"، - دەدى قالا اكىمى. جانە قالا حالقىن سابىرمەن كۇتە تۇرۋعا شاقىردى.
سالىنا باستاعاندا جولدىڭ 2019 جىلدىڭ اياعىندا بىتەتىنى ايتىلعان بولاتىن. الايدا مەجەلى ۋاقىتتا جول بىتپەدى. كەيىن جولدىڭ 2020 جىلدىڭ جازىندا بىتەتىنى ايتىلدى. ءبىراق 2021 جىل باستالسا دا التىن وردا ماڭى ءالى شاڭ مەن باتپاقتان، قۇرىلىس جۇمىستارىنان كوز اشپاۋدا.
پىكىر قالدىرۋ