الماتىدا ەكى كۇننەن بەرى تەرگەۋ يزولياتورىنان قاشىپ كەتكەن ادام ىزدەستىرىلىپ جاتىر. بۇل تۋرالى جۋرناليست ميحايل كوزاچكوۆ telegram-دا حابارلادى. قىلمىستىق اتقارۋ جۇيەسى كوميتەتىنىڭ ماماندارى وقيعا 15 اقپاندا بولعانىن راستادى.
جەلىدە تاراعان اقپاراتتا كۇدىكتى 15 اقپاندا 15:00 مەن 17:00 ارالىعىندا قوعامدىق قورعاۋشىمەن كەزدەسكەنى ايتىلادى. كەزدەسۋدەن كەيىن كۇدىكتى دارەتحاناعا سۇرانىپ، ارتىنشا كەزدەسۋ بولمەسىندە جاسىرىنىپ قالعان. ول جەردە قاس قارايعانشا وتىرىپ، ساعات 20:30-دا اكىمشىلىك عيماراتتىڭ اكت زالىنا ءوتىپ، سول جەردەگى قوسىمشا تەمىر ەسىكتى بۇزىپ، قاشىپ كەتكەن. ءبىر قىزىعى، ونىڭ جوقتىعى كەلەسى كۇنى بارىپ انىقتالعان.
اقپاراتتى راستاعان قىلمىستىق اتقارۋ جۇيەسى كوميتەتىنىڭ ماماندارى وقيعا الماتىداعى لا-155/18 مەكەمەسىندە بولعانىن حابارلادى. قاشىپ كەتكەن ادامنىڭ ءاتى-جونى د.ت. داۆۋتوۆ. 1987 جىلى تۋعان. اتالعان دەرەك بويىنشا الماتى پوليسيا دەپارتامەنتى قىلمىستىق كودەكستىڭ 426-بابىنا ساي (باس بوستاندىعىنان ايىرۋ ورىندارىنان، قاماقتان نەمەسە كۇزەتتەن قاشۋ) تەرگەۋ باستاعان، ىزدەۋ شارالارى جۇرۋدە. وقيعانىڭ ءمان-جايىن انىقتاۋ ءۇشىن قىزمەتتىك تەكسەرىس باستالدى. جاۋاپتى لاۋازىمدى تۇلعالارعا ءتيىستى شارا قولدانىلماق.
پىكىر قالدىرۋ