ماڭعىستاۋ وبلىسى ءۇشتاعان اۋىلىنداعى ەگىزدەر كوشەسى بار. بۇگىندە وندا جەتى بىردەي ەگىز تۇرادى، دەپ حابارلايدى "ەۋرازيا ءبىرىنشى" ارناسى.

– بۇل ەندى اللانىڭ بەرگەن سىيى شىعار بىزگە. تۇقىمىمىزدا بار. اۋىلىمىزدىڭ اۋاسى تازا، جەرى قۇنارلى. سوندىقتان ەگىزدەر كوپ تۋادى دەپ ويلايمىن، – دەدى ەگىزدەردىڭ ءبىرىنىڭ اناسى بيبىگۇل امانقۇسوۆا.

بيبىگۇل مەن جۇبايىنىڭ دا تۇقىمدارىندا ەگىز بولعاندىقتان، بۇل نارسەگە قالىپتى قۇبىلىس رەتىندە قاراسا كەرەك. 

– باسقا اۋىلداردا ەگىزدەر بىرەن-ساران. ءارى كەتسە 3-4 عانا. ءبىزدىڭ اۋىلدا ەكى ءۇيدىڭ بىرىندە ەگىز تۋادى دەۋگە بولادى. سونىڭ ارقاسىندا اياداي عانا اۋىلدا 30-دان استام ەگىز بار. بىزگە دەيىن دە سولاي بولعان، – دەدى ەگىزدىڭ سىڭارى بەكسۇلتان نۇرمۇقانوۆ.

بەكسۇلتاننىڭ نۇرسۇلتان دەگەن اعاسى، گۇلميرا مەن گۇلزيرا ەسىمدى ەكى اپكەسى بار. ياعني، ءبىر اۋلەتتە ەكى بىردەي ەكى ەگىز تۋعان.

بەرەكەلى جانۇيادا ەگىزدەر ءار جارتى عاسىر سايىن دۇنيەگە كەلەدى ەكەن. اتاسى، اكەسى، ءتىپتى بالالارىنىڭ دا ەگىزى بار. ال جۇپتارى جازىلماعان جانداردىڭ ءبىرى اۋىرا قالسا، ەكىنشىسى سول كۇيگە تۇسەتىن كورىنەدى.