بۇگىن ءماجىلىستىڭ جالپى وتىرىسىندا "اق جول" فراكسياسىنىڭ دەپۋتاتى بەرىك دۇيسەنبينوۆ جوعارى وقۋ ورىندارىنىڭ جەكەمەنشىك جەرلەرىنە قاتىستى دەپۋتاتتىق ساۋال جولدادى.

دۇيسەنبينوۆ اتاپ وتكەندەي، ءال-فارابي اتىنداعى قازاق ۇلتتىق ۋنيۆەرسيتەتىنىڭ جەر اۋماعى بەلگىسىز سەبەپتەرمەن ازايىپ قالعان جانە وسى ماسەلە قوعامدى الاڭداتىپ وتىر.

– جەر قۇقىعى بويىنشا ساراپشى، زاڭگەر باقىتجان بازاربەكتىڭ مالىمەتتەرىنە سۇيەنسەك، 2012 جىلعى 30 قاڭتارداعى الماتى قالاسى اكىمىنىڭ قاۋلىسىنا سايكەس eنيۆەرسيتەتتىڭ پايدالانۋ قۇقىعىنا جالپى كولەمى 73،26 گەكتار جەر بەرىلگەن. ال 2017 جىلى 2 قازاندا الماتى قالاسى اكىمىنىڭ № 4/392-22-36 دەگەن قاۋلىسىنا سايكەس ءقازۇۋ-نىڭ جالپى جەرى ۇلەستەرگە ءبولىنىپ، جەر كولەمى 72،48 گەكتار بولىپ شىقتى. سونىڭ ىشىندە ءقازۇۋ-نىڭ تىكەلەي ۇلەسىن الاتىن بولساق، ول – 71،40 گەكتار جەر، ياعني، وقۋ ورنىنىڭ جالپى جەر كولەمى 1،8 گەكتارعا ازايعانىن بايقايمىز، – دەيدى دەپۋتات.

"ۋنيۆەرسيتەتكە تيەسىلى جەر كولەمى نەگە ازايعان؟" دەگەن سۇراق ەشقانداي ۋاكىلەتتى ورگان ناقتى جاۋاپ بەرمەگەن. بەرىك دۇيسەنبينوۆ اتاپ وتكەندەي، جەر ماسەلەسى تەك بۇل ۋنيۆەرسيتەتپەن عانا شەكتەلىپ وتىرعان جوق.

– ەلدىڭ ءار ايماعىندا جوعارى وقۋ ورىندارى جەر تەلىمدەرىنىڭ جەكەمەنشىككە ساتىلىپ جاتقانىن، ستۋدەنت جاستار تۇراتىن جاتاقحانالاردىڭ ازايىپ، ۋنيۆەرسيتەت مەنشىگىندەگى وقۋ پروسەستەرىن قامتاماسىز ەتەتىن قوسىمشا جىلجىمايتىن مۇلىك وبەكتىلەرىنىڭ ساۋداعا سالىنىپ جاتقانىنان بۇقارالىق اقپارات قۇرالدارىنان جانە بارلىعىن كورىپ-بىلىپ وتىرعان ەلدىڭ اۋزىنان ەستىپ ءجۇرمىز. مىسالى، شىعىس قازاقستان مەملەكەتتىك ۋنيۆەرسيتەتىنىڭ باس عيماراتىنان ون قادام قاشىقتىقتا ورنالاسقان وندىرىستىك شەبەرحانا بۇگىندە ويىن-ساۋىق ورنىنا اينالعان، – دەدى دەپۋتات.

اتالعان ماسەلەلەردىڭ ماڭىزدىلىعىن بايانداعان "اق جول" فراكسياسىنىڭ دەپۋتاتتارى بىرىنشىدەن، قازاق ۇلتتىق ۋنيۆەرسيتەتىنە تيەسىلى جەر اۋماعىنان جەر ۋچاسكەلەرىنىڭ ءبولىنىپ شىعارىلعانى قانشالىقتى زاڭدى ەكەنىن تەكسەرىپ، زاڭسىزدىق انىقتالعان جاعدايدا ءتيىستى ادامداردى جاۋاپقا تارتۋدى، ەكىنشىدەن، وسىنداي تەكسەرۋدى وبلىستاردا ورنالاسقان جوعارى وقۋ ورىندارىندا دا جۇرگىزىپ، ناتيجەسىن بىزگە حابارلاۋدى تالاپ ەتتى.