سەرىك راحمەتوللا ۇلى ەگىزبايەۆ اقپارات جانە قوعامدىق دامۋ مينيسترلىگىنىڭ اپپارات باسشىسى لاۋازىمىنا تاعايىندالدى. بۇل تۋرالى پرەمەر-مينيستردىڭ باسپا ءسوز قىزمەتى حابارلادى.

"اقپارات جانە قوعامدىق دامۋ ءمينيسترىنىڭ بۇيرىعىمەن سەرىك راحمەتوللا ۇلى ەگىزبايەۆ اقپارات جانە قوعامدىق دامۋ مينيسترلىگىنىڭ اپپارات باسشىسى لاۋازىمىنا تاعايىندالدى" دەلىنگەن حابارلامادا.

سەرىك ەگىزبايەۆ 1963 جىلى باتىس قازاقستان وبلىسىندا دۇنيەگە كەلگەن.

باتىس قازاقستان اۋىلشارۋاشىلىعى ينستيتۋتىن، پرەزيدەنت جانىنداعى مەملەكەتتىك باسقارۋ اكادەمياسىن، قازاق مەملەكەتتىك زاڭ اكادەمياسىن، سونداي-اق بلكجو وك جانىنداعى جوعارى كومسومول مەكتەبىن ءتامامداعان.

ەڭبەك جولىن ورال (قازىرگى باتىس قازاقستان) وبلىسىنداعى "چاپايەۆ" زاۋىتىندا جۇمىسشى بولىپ باستاعان. اۋىلشارۋاشىلىعى ينستيتۋتىن بىتىرگەننەن كەيىن زاۋىتقا قايتا ورالدى.

1990-1993 جىلدارى ورال وبلىستىق قازاقستان جاستار وداعى يدەولوگيالىق ءبولىمىنىڭ مەڭگەرۋشى-حاتشىسى بولعان.

1993 جىلى باتىس قازاقستان وبلىستىق قازاقستان جاستار وداعىنىڭ ءبىرىنشى حاتشىسى بولىپ تاعايىندالدى.

1997-1998 جىلدارى باتىس قازاقستان وبلىسىنىڭ اكىمدىگىندە باس ينسپەكتور، ۇيىمداستىرۋ جانە كادر جۇمىسى دەپارتامەنتى ديرەكتورىنىڭ ورىنباسارى لاۋازىمدارىندا قىزمەت اتقاردى.

2000 جىلدان 2001 جىلعا دەيىن قارجى مينيسترلىگىنىڭ ۇيىمداستىرۋ جانە كادر جۇمىسى دەپارتامەنتىنىڭ ءبولىم باسشىسى بولىپ جۇمىس ىستەدى.

2001-2007 جىلدارى پرەمەر-مينيستردىڭ كەڭسەسىندە ءتۇرلى قىزمەتتەر اتقارعان.

2007-2016 جىلدارى پرەزيدەنتى اكىمشىلىگىندە ءتۇرلى لاۋازىمداردا جۇمىس ىستەگەن.

2016 جىلعى قازاندا اۋىلشارۋاشىلىعى ۆيسە-مينيسترى بولىپ تاعايىندالدى.

2017 جىلعى ناۋرىزدا "قازاقستان" رترك باسقارما ءتوراعاسىنىڭ وڭىرلىك دامۋ جونىندەگى ورىنباسارى بولعان.

2019 جىلعى قىركۇيەك ايىنان باستاپ قازىرگە دەيىن باتىس قازاقستان وبلىسى اكىمىنىڭ ورىنباسارى قىزمەتىن اتقاردى.