اتامەكەن ۇكپ ءتوراعاسىنىڭ ورىنباسارى يۋليا ياكۋپبايەۆا 2021 جىلعى 1 ناۋرىزدان باستاپ قازاقستاندا كارانتين تالاپتارى جەڭىلدەيتىنىن حابارلادى.

يۋليا ياكۋپبايەۆا بۇگىن وتكەن ۆەدومستۆوارالىق كوميسسيانىڭ وتىرىسىندا سىرقاتتانۋ دەڭگەيىنىڭ بىرتىندەپ تومەندەۋى ەسكەرىلىپ، ۇكپ مەن وڭىرلەردىڭ كەيبىر ۇسىنىستارى قولداۋ تاپقانىن ءمالىم ەتتى. سوعان ساي، تومەندەگىدەي قىزمەت تۇرلەرىنە رۇحسات ەتىلەدى.

"جاسىل ايماقتاعى وڭىرلەردە:
1) سپورتتىق جارىستارعا كورەرمەن قاتىسۋىنا (كەلۋشىلەر ءليميتى تالقىلانادى)
2) 50-گە دەيىنگى ادامدارعا بىرگە تاماقتانۋعا (ءبىراق زال قۋاتىنىڭ 30% ارتىق ەمەس)
3) بيليارد قىزمەتىنە
4) ءۇي-جايلارداعى بالالار ويىن-ساۋىق كلۋبتارىنىڭ قىزمەتىنە
5) سيركتەر قىزمەتى

سارى ايماقتاعى وڭىرلەردە:
جەكسەنبى كۇنى بازارلاردىڭ، ساۋدا ويىن-ساۋىق ورتالىعى مەن ساۋدا ۇيلەرىنىڭ جۇمىسىنا شەكتەۋلەر الىنىپ تاستالدى.

اشىق قوسىمشاسى:
1) بوۋلينگ قىزمەتىنە؛
2) كومپيۋتەرلىك كلۋبتاردىڭ قىزمەتىنە؛
3) فيتنەس-ورتالىقتار، باسسەيندەر قىزمەتىنە رۇحسات ەتىلەدى" دەلىنگەن ياكۋپبايەۆانىڭ جازباسىندا.

ونىڭ ايتۋىنشا، سانيتارلىق تالاپتاردى ساقتاي وتىرىپ، بارلىق بيزنەس سۋبەكتىلەرى بىرتىندەپ جۇمىسقا قايتا ورالادى.