Nur Otan-نىڭ رەسپۋبليكالىق قوعامدىق قابىلداۋ بولمەسىندە ازاماتتاردىڭ مينيسترلەرمەن جانە مەملەكەتتىك ورگانداردىڭ باسشىلارىمەن ونلاين-كەزدەسۋلەرى جالعاسۋدا. قازاقستاندىقتاردىڭ مينيسترلەرگە قانداي ماسەلەلەرمەن كەلەتىنى تۋرالى پارتيا ورتالىق اپپاراتىنىڭ باسپا ءسوز قىزمەتى حابارلايدى.

ادىلەت ءمينيسترى مارات بەكەتايەۆتىڭ ازاماتتاردى قابىلداۋى بارىسىندا اليمەنتتى ۋاقىتىلى تولەۋ تۋرالى ماسەلە بىرنەشە رەت كوتەرىلدى. كەنتاۋ تۇرعىنى باعيلا توعماعامبەتوۆا جەكە سوت ورىنداۋشىلارىنىڭ بەرەشەكتى ءوندىرىپ الۋ بويىنشا ارەكەتسىزدىگىنە شاعىمداندى. تۋرا وسىنداي ماسەلەمەن مينيسترگە تۇركىستان وبلىسىنىڭ تۇرعىنى اقمارال جاقىپوۆا دا جۇگىندى. قابىلداۋ قورىتىندىسى بويىنشا مينيستر وڭىرلىك قۇرىلىمدارعا بارلىق ماتەريالداردى زەردەلەپ، ءتيىستى شارالار قابىلداۋدى تاپسىردى.

ادۆوكات جاننا ورازباحوۆا ىشكى ىستەر ءمينيسترى ەرلان تۇرعىمبايەۆقا سەكسۋالدىق زورلىق-زومبىلىققا قارسى ارنايى ورتالىقتار قۇرۋدى ۇسىندى. ونىڭ ايتۋىنشا، بۇل ورتالىقتاردا زارداپ شەككەندەرگە كومەك «ءبىر تەرەزە» قاعيداتى بويىنشا كورسەتىلۋى مۇمكىن، ياعني، سول جەردە پوليسيا بىردەن شاعىمىن قابىلداپ، دارىگەرلەر تەكسەرۋ جۇرگىزىپ، پسيحولوگتار قاجەتتى كومەك كورسەتەدى.

ءوز كەزەگىندە ەرلان تۇرعىمبايەۆ جوبامەن ەگجەي-تەگجەيلى تانىسۋعا ۋادە بەردى. ءمينيستردىڭ ازاماتتاردى قابىلداۋى 4 ساعاتتان استام ۋاقىتقا سوزىلعانىن ايتا كەتەيىك.

قارجى ءمينيسترى ەرۇلان جاماۋبايەۆتىڭ قابىلداۋىندا «تەمەكى تۇتىنىنەن ازات قازاقستان ءۇشىن» كواليسياسىنىڭ جەتەكشىسى ءجاميلا سادىقوۆا قازاقستانداعى زياندى ونىمدەردى رەتتەۋ ماسەلەسىن كوتەردى.

الماتى قالاسىنىڭ تۇرعىنى گۇلداريا قاستەيەۆا مادەنيەت جانە سپورت ءمينيسترى اقتوتى رايىمقۇلوۆاعا ءا.قاستەيەۆتىڭ مۋزەي-ۇيىنە قالپىنا كەلتىرۋ جۇمىستارىن جۇرگىزۋ جانە ىرگەلەس اۋماقتىڭ كۇردەلى جوندەۋ مەن اباتتاندىرۋدى قاجەت ەتەتىنىن، سونداي-اق قىزمەتكەرلەردىڭ جەتىسپەيتىنىن ايتتى. مينيستر بۇل ماسەلەنى ءوزىنىڭ جەكە باقىلاۋىنا الدى.

ءبىلىم جانە عىلىم ءمينيسترى اسحات ايماعامبەتوۆپەن كەزدەسۋدە ازاماتتار قاشىقتان وقىتۋ جانە پەداگوگيكالىق ماماندىق تۇلەكتەرىن جۇمىسقا ورنالاستىرۋ ماسەلەلەرىن كوتەردى.

سونداي-اق پرەمەر-مينيستردىڭ ورىنباسارى رومان سكليار مەن ۇلتتىق ەكونوميكا ءمينيسترى اسەت ەرعالييەۆ تا ازاماتتاردى قابىلدادى.

ايتا كەتەيىك، وتكەن جىلى Nur Otan پارتياسىنىڭ قوعامدىق قابىلداۋ بولمەسىنە بۇكىل ەل بويىنشا 393 مىڭنان استام ءوتىنىش كەلىپ ءتۇستى بۇل – 2019 جىلمەن سالىستىرعاندا 2 ەسە كوپ. بۇل رەتتە سوڭعى 5 جىلدا پارتياعا 1،2 ملن ادام جۇگىندى، ونىڭ ىشىندە 423 مىڭنان استامى – ونلاين فورماتتا. ولاردىڭ 92% وڭ شەشىمىن تاپتى، تەگىن كونسۋلتاتيۆتىك، قۇقىقتىق جانە وزگە دە كومەك كورسەتىلدى.

تالداۋ كورسەتكەندەي، حالىقتى نەگىزىنەن الەۋمەتتىك قامسىزداندىرۋ – 30%، تۇرعىن ۇي-كوممۋنالدىق شارۋاشىلىق – 16%، تۇرعىن ۇيمەن قامتاماسىز ەتۋ – 15%، ەڭبەك داۋلارى – 14%، قۇرىلىس – 9%، ءبىلىم بەرۋ – 9%، مەديسينالىق قىزمەت كورسەتۋ – 7% ماسەلەلەرى الاڭداتتى.

مينيسترلەردىڭ – Nur Otan پارتياسى مۇشەلەرىنىڭ قابىلداۋىنا جازىلۋ ءۇشىن تومەندەگى نومىرلەرگە حابارلاسۋ كەرەك:

1. Call-ورتالىق 8 800 080 4441 (قازاقستان بويىنشا قوڭىراۋ شالۋ تەگىن)؛
2. Whatsapp 8700 800 4441
3. komek@nurotan.kz