قازاقستاندىق مۋزىكانت يمانبەك زەيكەنوۆتىڭ SAINt JHN اتتى ءانشىنىڭ Roses انىنە جازىلعان رەميكسى Grammy سىيلىعىنىڭ "ۇزدىك رەميكس" نوميناسياسىن جەڭىپ الدى.

Grammy سىيلىعى – امەريكانىڭ ۇلتتىق دىبىس جازۋ ونەرى جانە عىلىم اكادەمياسى (NARAS) تاپسىراتىن مۋزىكالىق سىيلىق.  بۇل – بۇگىندە مۋزىكا يندۋسترياسىندا ەڭ ابىرويلى ماراپات. 

بيىل Grammy سىيلىعى 63ء-شى رەت ۇيىمداستىرىلىپ وتىر. 20 جاستاعى يمانبەك زەيكەنوۆ – شىعارماسى Grammy سىيلىعىنا ۇسىنىلعان ءارى جەڭگەن العاشقى قازاقستاندىق. 

– "گرەمميدى" الدىق! جىگىتتەر، "گرەممي" – بىزدىكى! – دەدى مۋزىكانت instagram الەۋمەتتىك جەلىسىندە جاريالاعان ۆيدەودا.

سىيلىق ۇتىپ العان ساتىندە ول اتا-اناسىنا، كومانداسىنا، Effective Records لەيبلىنە، مەنەدجەرى كيريللگە جانە Grammy ۇيىمداستىرۋشىلارىنا العىسىن ايتتى.

Roses (SAINt JHN) ءانىنىڭ ءتۇپنۇسقاسى 2016 جىلى جارىققا شىققان. ال رەميكسىن 2019 جىلى جازعاننان كەيىن يمانبەكتىڭ الەمگە تانىمال بولدى. ونىڭ رەميكسى Apple Musicء-تىڭ ۇزدىك وندىعىنا كىرىپ، Shazam مۋزىكالىق قوسىمشاسىندا 22 ميلليوننان استام قارالدى. يمانبەكتىڭ تۋىندىسى Youtube-تە 234،5 ميلليون رەت كورىلگەن.

يمانبەك زەيكەنوۆ 2000 جىلى 21 قازاندا دۇنيەگە كەلگەن. ول بۇعان دەيىن پاۆلودار وبلىسى اقسۋ قالاسىندا تەمىر جولدا جۇمىس ىستەدى.