الماتى وبلىسىندا جەدەل جاردەم قىزمەتكەرلەرىنە شابۋىل جاسالدى. بۇل تۋرالى وبلىستىق دەنساۋلىق ساقتاۋ باسقارماسى ءمالىم ەتتى.

16 ناۋرىز ساعات 16:17-دە جەدەل جاردەم بەكەتىنە ەسىك قالاسىنا قاراستى ساياجايعا شاقىرتۋ تۇسەدى. وعان 23-بريگادانىڭ 22-قوسالقى ستانسياسىنىڭ فەلدشەرى س.ا.ەلەكەنوۆ شىعادى. اۋا رايىنىڭ قولايسىزدىعىنا بايلانىستى كوماندا شاقىرىلعان جەرگە 16:32-دە جەتكەن. جەدەل جاردەم جەتكەنشە ناۋقاس قايتىس بولعان.

فەلدشەر ەلەكەنوۆ پەن جۇرگىزۋشى مولداحمەتوۆتىڭ ايتۋىنشا، ناۋقاسقا كەلگەندە ولاردى ەر ادام اگرەسسيۆتى تۇردە قارسى العان. ناۋقاستى تەكسەرگەن فەلدشەر ونىڭ ءولىمى تۋرالى مالىمدەگەن. اكەسىنىڭ قايتىس بولعانىن ەستىگەن ەر ادام پىشاق الىپ، دارىگەرلەرگە قاراي جۇگىرگەن. مارقۇمنىڭ تۋىستارى ءمايىتتى كولىككە كۇشتەپ سالعان.

ەڭبەكشىقازاق اۋداندىق كوپسالالى اۋرۋحاناسىنا كەلگەن كەزدە مارقۇمنىڭ ۇلى قىزمەتكەرلەردى بالاعاتتاپ، جەدەل جاردەم كولىگىنىڭ جۇرگىزۋشىسى مولداحمەتوۆتىڭ بەتىنەن ۇرىپ، تاعى بىرنەشە سوققى جۇمساعان. تاياق جەگەن جۇرگىزۋشىگە وقيعا ورنىندا مەديسينالىق كومەك كورسەتىلىپ، اۋرۋحاناعا جاتقىزىلدى. ءقازىر اتالعان جاعدايمەن قۇزىرلى ورگاندار تەرگەۋ جۇمىستارىن جۇرگىزۋدە.