الماتىداعى شوقان ءۋاليحانوۆ اتىنداعى الاڭدا ءوتىپ جاتقان دەموكراتيالىق پارتيا باستاماشىل توبى جاقتاستارىنىڭ ميتينگىنە وپپوزيسيالىق جۋرناليستەر ەرمۇرات باپي مەن رىسبەك سارسەنباي دا كەلدى.

ميتينگتە ءسوز العان ەرمۇرات باپي بيلىككە قارسى ارەكەتتەردە حالىقتىڭ قولى بيلىكتىڭ جاعاسىنا جەتەتىندەي جاعدايدا بولۋى كەرەك ەكەنىن ايتتى.

– حالىقتىڭ ەكى قولىنا ءبىر كۇرەك بولاتىنداي جۇمىس جوق. ەندى ەكى اياعىمىزدى باسىپ تۇراتىن جەرىمىزدى دە وزىمىزگە قالدىرمايىن دەپ جاتىر. جەر ماسەلەسىنە قاتىستى جالپىحالىقتىق قوزعالىس ۇيىمداستىرۋ كەرەك. بۇعان بارلىق ۇيىمدار قاتىسۋى كەرەك. قازاقتىڭ جەرىنىڭ ماسەلەسى جالپىحالىقتىق ماسەلە، ءبىزدىڭ ەرتەڭگى بولاشاعىمىزدىڭ ماسەلەسى. جالپىحالىقتىق ميتينگ جاساعاندا عانا جەرىمىزدى قورعاپ قالا الامىز، – دەدى ول.

جۋرناليست رىسبەك سارسەنباي قازاقستاننىڭ ەكس-پرەزيدەنتى نۇرسۇلتان نازاربايەۆ تا، قازىرگى پرەزيدەنت قاسىم-جومارت توقايەۆ بەرگەن ۋادەلەرىن ورىنداماعانىنا نازار اۋداردى.

– بۇگىن ەل، جەردى، تاۋەلسىزدىكتى قورعاماساق، ەرتەڭ كەش بولادى. بۇلاي جالعاسا بەرسە، جەردەن دە، ەلدەن دە ايىرىلامىز. نازاربايەۆ پەن توقايەۆ 500 مىڭ ادامدى جۇمىسپەن قامتيتىندارىن، 1200 كاسىپورىن سالاتىندارىن ايتقان. سول ۋادەلەرى قايدا؟ قايدا سول كاسىپورىندار؟ سول 1200 كاسىپورىن بۇگىندە جۇمىس ىستەپ تۇرسا، قىتايدىڭ 56 زاۋىتىنا كۇنىمىز قاراپ قالار ما ەدى، – دەيدى جۋرناليست.

ميتينگ ءوتىپ جاتقان اۋماقتا ءالى دە ينتەرنەت ىستەمەيدى.

ميتينگكە شىققانداردىڭ قولدارىنداعى پلاكاتتاردا "جۇڭگو ەلشىسى ەلشى مە، جاۋشى ما؟"، "ۇكىمەت قازاقستاندى ساۋداعا سالماق"، "جۇڭگو ەكسپانسياسىنا جول جوق"، "جۇڭگو، جەرىمىزگە كوز سالما"، "جەرىڭدى قورعاماساڭ، "جەر" بولاسىڭ"، "جۇڭگو ەكسپانسياسى تاۋەلسىزدىكتەن ايىرۋ"، "جەر ساتىلمايدى، جالعا بەرىلمەيدى"، "ساڭىراۋ پرەزيدەنت كەرەك ەمەس"، "ۇلتاراقتاي بولسا دا، اتاقونىس جەر قىمبات" دەپ جازىلعان.

وسى كۇنى شەتەلدەگى وپپوزيسيونەر مۇحتار ءابليازوۆ تا جاقتاستارىن بىرنەشە قالادا ميتينگكە شىعۋعا شاقىرعان. الماتىداعى ميتينگ ورنى رەتىندە ول دا شوقان ءۋاليحانوۆ اتىنداعى الاڭدى بەلگىلەگەن.

دەمپارتيا بەلسەندىسى داۋرەن دوستياروۆ الاڭدا 400-گە جۋىق جاقتاستارىنىڭ جۇرگەنىن ايتادى. سونداي-اق ول الاڭعا كەلە جاتقان بەلسەندىلەردىڭ جولدا ۇستالعانى تۋرالى حابار جەتىپ جاتقانىن جەتكىزدى.

قامشى ءتىلشىسى دە بۇل جولعى ميتينگكە بۇعان دەيىنگى اكسيالارعا قاراعاندا كوپ ادامنىڭ جينالعانىن بايقاعان.