الماتىداعى شوقان ءۋاليحانوۆ اتىنداعى الاڭدا دەموكراتيالىق پارتيا باستاماشىل توبى مەن ونىڭ جاقتاستارىنىڭ جۇڭگو ەكسپانسياسىنا قارسى ميتينگى باستالدى.

ميتينگكە الماتى اكىمدىگى رۇحسات بەرگەن. الايدا وقيعا ورنىندا جۇرگەن قامشى تىلشىلەرى الاڭدى ارنايى جاساق پەن پوليسيا قىزمەتكەرلەرى دوستىق جانە قونايەۆ كوشەلەرى جاعىنان جاۋىپ تاستاعانىن، الاڭدا ينتەرنەت ىستەمەيتىنىن، 4 ادامدى اۆتوزاگقا سالىپ الىپ كەتكەنىن ايتادى.

دەموكراتيالىق پارتيا باستاماشىل توبىنىڭ جەتەكشىسى جانبولات ماماي قامشى تىلشىسىنە بۇدان بولەك تاعى 6 ادامدى ۇستاعانىن جەتكىزگەن.

جانبولات ماماي ۇستالعان جاقتاستارىنا اراشا تۇسپەك بولعانىمەن، ارنايى جاساق وكىلدەرى وعان مۇرسات بەرمەگەن. بۇل جاعدايعا پىكىر بىلدىرگەن ول "زاڭدى ميتينگ بولا تۇرا بيلىك زاڭسىزدىققا بارىپ وتىر" دەيدى.

ميتينگكە شىققانداردىڭ قولدارىنداعى پلاكاتتاردا "جۇڭگو ەلشىسى ەلشى مە، جاۋشى ما؟"، "ۇكىمەت قازاقستاندى ساۋداعا سالماق"، "جۇڭگو ەكسپانسياسىنا جول جوق"، "جۇڭگو، جەرىمىزگە كوز سالما"، "جەرىڭدى قورعاماساڭ، "جەر" بولاسىڭ"، "جۇڭگو ەكسپانسياسى تاۋەلسىزدىكتەن ايىرۋ"، "جەر ساتىلمايدى، جالعا بەرىلمەيدى"، "ساڭىراۋ پرەزيدەنت كەرەك ەمەس"، "ۇلتاراقتاي بولسا دا، اتاقونىس جەر قىمبات" دەپ جازىلعان.

وسى كۇنى شەتەلدەگى وپپوزيسيونەر مۇحتار ءابليازوۆ تا جاقتاستارىن بىرنەشە قالادا ميتينگكە شىعۋعا شاقىرعان. الماتىداعى ميتينگ ورنى رەتىندە ول دا شوقان ءۋاليحانوۆ اتىنداعى الاڭدى بەلگىلەگەن.

دەمپارتيا بەلسەندىسى داۋرەن دوستياروۆ الاڭدا 400-گە جۋىق جاقتاستارىنىڭ جۇرگەنىن ايتادى. سونداي-اق ول الاڭعا كەلە جاتقان بەلسەندىلەردىڭ جولدا ۇستالعانى تۋرالى حابار جەتىپ جاتقانىن جەتكىزدى.

قامشى ءتىلشىسى دە بۇل جولعى ميتينگكە بۇعان دەيىنگى اكسيالارعا قاراعاندا كوپ ادامنىڭ جينالعانىن بايقاعان.

وقي وتىرىڭىز:

♦ الماتىداعى ميتينگ. نارازى توپقا بەلگىلى وپپوزيسيالىق جۋرناليستەر قوسىلدى

♦ جانبولات ماماي: قازاق جەرىندە قىتايدىڭ 56 زاۋىتىنىڭ قۇرىلىسىن جۇرگىزۋگە قارسىمىز!