"جۇلدىز كەمەنىڭ ۇشۋ سىناعى ەرتەڭ تۇستەن كەيىن بولۋى مۇمكىن" دەپ حابارلادى Spacex كومپانيانىڭ نەگىزىن قالاۋشى يلون ماسك 12 ساعات بۇرىن ءوزىنىڭ Twitter پاراقشاسىندا.

جۇلدىز كەمەنىڭ SN11 دەپ اتالاتىن سوڭعى نۇسقاسىنىڭ سىناعى اۋەلدە 15 ناۋرىزدان باستالاتىن اپتاعا جوسپارلانعان بولاتىن، ءبىراق SpaceX كومپانياسى تەكسەرۋ بارىسىندا سىناقتى كەشىكتىردى.

26 ناۋرىزداعى ستاتيكالىق وتالدىرۋ سىناعىنان كەيىن ماسك SN11 اسپانعا كوتەرىلمەس بۇرىن "قوسىمشا تەكسەرۋلەر" قاجەت ەكەنىن مالىمدەدى.

ستاتيكالىق وتالدىرۋ سىناعى بولعان كەزدە زىمىران جەردە قوزعالماي تۇرىپ بارلىق قوزعالتقىشتارىنان ءورت شىققانى بايقالدى.

ماسك سىناق كەزىندە قانداي پروبلەمالار تۋىنداعانىن ەگجەي-تەگجەيلى تۇسىندىرمەدى، ءبىراق Twitter پاراقشاسىندا جۇلدىز كەمەنىڭ SN11 نۇسقاسى دۇيسەنبىگە دەيىن قايتا دايىن بولاتىنىن ايتتى.

"قوسىمشا تەكسەرۋلەر قاجەت. جەرگە قونۋعا جانە تولىق قالپىنا كەلۋگە بار كۇشىمىزدى سالامىز" دەپ جازدى ماسك.

دەگەنمەن جۇلدىز كەمە ۇشىرىلاتىن بوكا چيكا پوليگونى ورنالاسقان كامەرون وكرۋگىندە وسى اپتادا جول جابىلاتىنى تۋرالى ءالى ەشقانداي حابارلاما جاساعان جوق.

بۇرىنعى SN8، SN9 جانە SN10 جۇلدىز كەمەلەرى 10 مينۋتتاي اسپانعا كوتەرىلىپ، بىرنەشە مانيەۆردەن كەيىن قونۋعا تىرىسقان. ءبىراق SN8 جانە SN9 قوناتىن كەزدە جارىلىپ كەتسە، SN10 جۇلدىز كەمەسى جەرگە ءساتتى قونعاننان بىرنەشە مينۋتتان كەيىن جارىلعان..

Tesla جانە SpaceX كومپانياسىنىڭ باس اتقارۋشى ديرەكتورى يلون ماسك وسىنداي جۇلدىز كەمەلەرمەن كەلەسى ون جىلدىڭ ىشىندە مارسقا ادامداردى جەتكىزەتىنىن ايتادى. ونىڭ سوزىنشە، 1000 جۇلدىز كەمەسى بولادى جانە ونىڭ ءاربىرى 100 ادام الىپ جۇرە الادى. 2050 جىلعا دەيىن قىزىل عالامشاردا قالا سالىنىپ، وندا ءبىر ميلليون ادام ءومىر سۇرەتىن بولادى. 

سىناقتان وتكىزىلىپ جاتقان جۇلدىز كەمە مارسقا عانا ەمەس، ايعا ۇشاتىن ميسسيالارعا دا قولدانىلماق.

جاقىندا جاپون ميللياردەرى يۋساكۋ ماەزاۆا جۇلدىز كەمەمەن ايدى اينالىپ وتۋگە 8 ادام ىزدەيتىنىن جاريالادى.

يلون ماسكتىڭ ايتۋىنشا، جۇلدىز كەمە ادامداردى جەرشارىنىڭ كەز كەلگەن نۇكتەسىنە تەز جەتكىزۋگە دە قولدانىلادى. ونىڭ سوزىنە سەنسەك، ادامدار جۇلدىز كەمەمەن نيۋ-يوركتان توكيوعا جارتى ساعاتتا جەتە الادى. ساپاردىڭ قۇنى كوممەرسيالىق ۇشاقتارداعى بيزنەسكلاسس پەن ەكونومكلاستىڭ اراسىندا بولۋى ىقتيمال.