قازاقستاندا العاش رەت پەداگوگتەرگە "قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى بەرىلدى. بۇل تۋرالى ءبىلىم جانە عىلىم مينيسترلىگىنىڭ باسپا ءسوز قىزمەتى حابارلادى.
ۆەدومستۆو مالىمەتىنشە، 20-دان استام ءمۇعالىم ءبىلىم بەرۋ سالاسىنا سىڭىرگەن ەڭبەگى ءۇشىن مەملەكەتتىك ماراپاتقا يە بولعان. ءبىلىم جانە عىلىم ءمينيسترى اسحات ايماعامبەتوۆ پەداگوگتەرگە مەملەكەتتىك ناگرادانى تابىس ەتىپ، ولارعا العىس ءبىلدىردى.
– پەداگوگتەرگە مەملەكەت تاراپىنان ەرەكشە كوڭىل ءبولىنىپ جاتىر. مەملەكەت باسشىسىنىڭ تاپسىرماسى بويىنشا العاش رەت "قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى تاعايىندالدى. ەڭبەكتەرىڭىز بەن وسكەلەڭ ۇرپاقتى تاربيەلەۋگە قوسقان ۇلەستەرىڭىز ءۇشىن العىس ايتامىن. ناگرادالارىڭىز قۇتتى بولسىن! سىزدەرگە مىقتى دەنساۋلىق، وتباسىلارىڭىزعا اماندىق، باق-بەرەكە تىلەيمىن، – دەدى ايماعامبەتوۆ.
"قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى مۇعالىمدەرگە ۇزدىك جەتىستىكتەرى مەن مەملەكەت الدىنداعى ەرەكشە ەڭبەگى ءۇشىن بەرىلەدى. جوعارى اتاققا يە بولعان پەداگوگ 1 000 اەك (2 ملن 917 مىڭ تگ) مولشەرىندە ءبىرجولعى تولەم الادى" دەلىنگەن حابارلامادا.
پىكىر قالدىرۋ