اقش پرەزيدەنتى دجو بايدەن تەلەفون ارقىلى ۇلىبريتانيا پرەمەر-مينيسترى بوريس دجونسونمەن سويلەسىپ، قىتايدىڭ "ءبىر بەلدەۋ، ءبىر جول" جوباسىمەن باسەكەلەس بولاتىن اۋقىمدى ينفراقۇرىلىمدىق جوسپار بولۋى كەرەك ەكەنىن ايتتى.

اقش پرەزيدەنتى ۇلىبريتانيا پرەمەر-مينيسترىنە شالعان ەكىنشى قوڭىراۋىندا بەيجىڭنىڭ جوباسى قىتايدىڭ ەكونوميكالىق جانە ساياسي ىقپالىن ەداۋىر كۇشەيتەتىنىنە الاڭداۋشىلىق ءبىلدىردى.

– مەن دەموكراتيالىق مەملەكەتتەردىڭ قولداۋىنا مۇقتاج دۇنيەجۇزىلىك قوعامداستىقتارعا كومەكتەسەتىن وسىنداي باستاما كوتەرۋىمىز كەرەك دەپ ۇسىندىم، – دەدى بايدەن جۋرناليستەرگە.

ءبىر بەلدەۋ، ءبىر جول جوباسىن 2013 جىلى جۇڭگو ءتوراعاسى سي سزينپين باستاعان. بۇل شىعىس ازيادان ەۋروپاعا دەيىن سوزىلاتىن دامۋ جانە ينۆەستيسيالىق باستامالاردى قامتيتىن بىرنەشە تريلليون دوللارلىق ينفراقۇرىلىمدىق سحەما.

بۇعان دەيىن بايدەن ءوزىنىڭ العاشقى تولىق باسپا ءسوز بريفينگىندە الەم "ءتورتىنشى ونەركاسىپتىك ريەۆوليۋسيادان" ءوتىپ جاتقانىن جانە بەيجىڭ جاھاندىق ۇستەمدىكتى ورناتقىسى كەلەتىنىن ايتقان.

– مەن قىتايمەن قاتاڭ باسەكەلەستىكتى كورىپ وتىرمىن. ولار الەمدەگى جەتەكشى ەل، الەمدەگى ەڭ باي مەملەكەت جانە الەمدەگى ەڭ قۋاتتى مەملەكەت بولۋى ءۇشىن جالپى ماقسات قويعان. مەنىڭ كەزىمدە بۇلاي بولمايدى، – دەپ مالىمدەدى ول.

بايدەن وسى اپتادا اقش-تىڭ ينفراقۇرىلىمىن جاڭارتۋدىڭ بىرنەشە تريلليوندىق جوسپارىن جاريالاماقشى.

ۆاشينگتون كۆانتتىق ەسەپتەۋ، جاساندى ينتەللەكت جانە بيوتەحنولوگيا سياقتى جاڭا تەحنولوگيالار ينۆەستيسيالارىنىڭ كوبەيۋىن قامتاماسىز ەتەتىنىن مالىمدەدى.

اقش-تىڭ بۇرىنعى پرەزيدەنتى دونالد ترامپ تا قىتايدىڭ "ءبىر بەلدەۋ، ءبىر جول" باستاماسىنا قارسى جۇمىس ىستەيتىنىن ايتقان. الايدا سوڭعى بىرنەشە جىلدا لاتىن امەريكاسىنداعى وننان استام ەل مەن كاريب تەڭىزىندەگى 10 ەل قىتايدىڭ جوباسىنا قوسىلىپ ۇلگەردى.

وعان قوسا، شىعىس جانە وڭتۇستىك ەۋروپاداعى ناتو-عا مۇشە ەلدەردىڭ بارلىعى دەرلىك بەيجىڭنىڭ جوباسىمەن بىرلەستىكتەر قۇردى.

Refinitiv دەرەكقورىنىڭ مالىمەتتەرى بويىنشا، وتكەن جىلدىڭ ورتاسىنا قاراي 3،7 تريلليون دوللار تۇراتىن 2600-دەن استام جوبا "ءبىر جول، ءبىر بەلدەۋمەن" بايلانىستى بولعان.