ءماجىلىس دەپۋتاتى بەكبولات تىلەۋحان 8-ناۋرىز كۇنى الماتى قالاسىندا وتكەن 5 فەمينيستىك ۇيىمنىڭ شەرۋىن سىنعا الىپ، پرەمەر-مينيستردىڭ ورىنباسارى ەرالى توعجانوۆقا دەپۋتاتتىق ساۋال جولدادى.
دەپۋتاتتىڭ سوزىنشە، شەرۋ بارىسىندا الماتى قالاسى اكىمدىگىنە بەرگەن وتىنىمدە كورسەتىلگەن سۇراقتاردان باسقا قازاق حالقىنىڭ دۇنيەتانىمىنا جات نارسەلەر كوتەرىلگەن. ول قازاقستاندا تىيىم سالىنعان ەكسترەميستىك ۇيىمنىڭ (كوشە پارتياسى) لوزۋنگتارىن كوتەرگەندەر بولعانىن بايقاعانىن دا ايتادى.
– بۇل شەرۋ ءبىر قاراعاندا تۇرمىستىق زورلىق-زومبىلىققا قارسى شەرۋ سەكىلدى كورىنىس الادى. الايدا شەرۋدىڭ كۇن ءتارتىبى مۇلدە باسقا ارناعا بۇرىلىپ كەتتى. بەلسەندىلەردىڭ سويلەگەن سوزدەرى بۇكىل الەۋمەتتىك جەلىلەردە كەڭىنەن تارالىپ جاتىر. ول ۆيدەولاردى ءبىزدىڭ بالالارىمىز دا كورەدى. بۇل بارشامىزدىڭ رۋحاني قۇندىلىقتارىمىزعا جاسالعان شابۋىل دەپ تۇسىنەمىز. سول سەبەپتى دە ۇرپاقتارىمىزدى وسى سىندى اقپاراتتاردان ساقتاۋ جولىندا ارەكەت ەتۋىمىز قاجەت، – دەدى ب. تىلەۋحان.
سونداي-اق دەپۋتات الماتىداعى شەرۋ زاڭ تالاپتارىنا ساي وتكەنىن، ەكسترەميستىك توپتار ەركىن الاڭعا شىعۋعا قالا اكىمدىگىنەن رۇقسات العان، الماعانىن انىقتاپ، بالالاردى زياندى اقپاراتتان قورعاۋ باعىتىندا ءبىرجىنىستى نەكەدەن ساقتايتىن زاڭ نورمالارىن پارلامەنتكە ەنگىزۋدى ۇسىندى.
پىكىر قالدىرۋ