مەملەكەتتىك ەلتاڭبانىڭ، الماتىداعى تاۋەلسىزدىك مونۋمەنتىنىڭ اۆتورى، ساۋلەتشى، اقىن، عالىم ءارى قوعام قايراتكەرى شوتا ءۋاليحانوۆ قايتىس بولدى. بۇل تۋرالى مادەنيەت جانە سپورت ءمينيسترى اقتوتى رايىمقۇلوۆا حابارلادى.

"قازاقستان رەسپۋبليكاسى مادەنيەت جانە سپورت مينيسترلىگىنىڭ اتىنان كورنەكتى ساۋلەتشى، پروفەسسور، قازاقستاننىڭ ەڭبەك سىڭىرگەن قايراتكەرى شوت-امان ىدىرىس ۇلى ءۋاليحانوۆتىڭ قايتىس بولۋىنا بايلانىستى وتباسى مەن جاقىندارىنىڭ قايعىسىنا ورتاقتاسىپ، كوڭىل ايتامىن.

ش. ىدىرىس ۇلى سانالى عۇمىرىن سۇيىكتى ىسىنە ارناپ، ماعىنالى ءومىر سۇرگەن ءوز ورتاسىنا سىيلى، بولمىسى بولەك جان ەدى. ول حالقىمىزدىڭ تاريحىنداعى ارداقتى تۇلعالاردىڭ ەسكەرتكىشىن جاساپ، ەر ەسىمىن ەل اراسىندا ۇلىقتاۋعا، ساۋلەتى كوز تارتار عيماراتتاردىڭ بوي كوتەرۋىنە سۇبەلى ۇلەس قوستى. 

سەگىز قىرلى، ءبىر سىرلى اعامىز ەلىمىزدىڭ ساۋلەت جانە بەينەلەۋ ونەرىنىڭ وزەكتى ماسەلەلەرىن كوتەرگەن كوپتەگەن عىلىمي ماقالامەن قاتار ءبىرقاتار درامالىق شىعارما جازدى. ولاردىڭ قاتارىندا "تاعدىر"، "شوقاننىڭ انتى"، "اقنۇر"، "شوقاننىڭ اق تۇندەرى"، "تەررور" اتتى پەساسى بار.

عيبراتتى ازاماتتىڭ اسىل بەينەسى، ەرەن ەڭبەگى تۋعان-تۋىس پەن قالىڭ قازاقتىڭ كوڭىل ءتورى مەن جۇرەك تۇكپىرىندە ماڭگى ساقتالادى" دەلىنگەن حابارلامادا.

شوت-امان (شوتا) ىدىرىس ۇلى ءۋاليحانوۆ 1932 جىلى 26 ساۋىردە كوكشەتاۋ وڭىرىندەگى ايىرتاۋ اۋدانى، سىرىمبەت اۋىلىندا دۇنيەگە كەلگەن.

كازگورودوك (قازىرگى سىرىمبەت) ورتا مەكتەبىن كۇمىس مەدالمەن ءتامامداعان شوتا ءۋاليحانوۆ 1950 جىلى ماسكەۋ ساۋلەت ينستيتۋتىنا وقۋعا ءتۇسىپ، ونى 1956 جىلى بىتىرگەن.

ەڭبەك جولىن الماتى قالاسىنداعى "كازگورسترويپروەكت" مەملەكەتتىك جوبالاۋ ينستيتۋتىندا ساۋلەتشى بولىپ باستاعان.