ءماجىلىستىڭ جالپى وتىرىسىندا دەپۋتات جۇلدىز سۇلەيمەنوۆا مەكتەپ وقۋشىلارىنىڭ ساپالى ءبىلىم الۋىنا قولجەتىمدىلىكتى قامتاماسىز ەتۋگە قاتىستى دەپۋتاتتىق ساۋال جولدادى. دەپۋتات 25 ناۋرىزىندا جاريالانعان باس مەملەكەتتىك سانيتار دارىگەردىڭ قاۋلىسىنداعى IV توقساندا تومەن جانە ورتاشا تاۋەكەل ايماقتارىنداعى بالا سانى 300-دەن ءۇش مىڭعا دەيىنگى وقۋشىنى قامتيتىن قالا جانە اۋىل مەكتەپتەرى ارالاس فورماتتا وقيتىنى تۋرالى پۋنكتكە بايلانىسى بىرنەشە ماسەلە كوتەردى.
– اتالعان ماسەلە حالىق تىعىز ورنالاسقان وڭتۇستىك ايماقتارىنا عانا ەمەس، ەلورداعا جاقىن ورنالاسقان ورتا مەكتەپتەرگە دە قاتىسى بار ەكەندىگىنە نازارىڭىزدى اۋدارعىمىز كەلەدى. سەبەبى ءبىر عانا يلينكا اۋىلىندا جوبا قۋاتتىلىعى 1200 وقۋشىعا ارنالعان ورتا مەكتەپتە بۇگىندە 3 مىڭنان استام بالا وقيتىندىعى ەشكىمگە جاسىرىن ەمەس. وسى رەتتە، باس سانيتار دارىگەردىڭ سىنىپتارداعى بالالار سانىن 25 ادامنان اسىرماي، ارالاس فورماتتا وقىتۋ جانە "1 سىنىپ – 1 كابينەت" قاعيداتىن ساقتاۋ قاۋلىسىن ورىنداۋ مۇلدەم مۇمكىن ەمەس. ويتكەنى كوپشىلىك ورتا ءبىلىم بەرۋ مەكەمەلەرىندە قالىپتاسقان جاعدايعا سايكەس ءبىر سىنىپتا وقۋشى سانى 35-تەن جوعارى مەكتەپتەر بار. بۇل شارا ءوز كەزەگىندە وسىنداي سىنىپتاردى ەكىگە بولۋگە، سايكەسىنشە ءمۇعالىم جۇكتەمەسىن ەكى ەسە ارتتىرۋعا الىپ كەلەدى. وقۋ جىلىنىڭ سوڭىندا ءمۇعالىمنىڭ جوسپارلانباعان مۇنداي جۇكتەمەسىنە جالاقىنىڭ قانداي قاراجاتتان تولەنۋى ۇلكەن سۇراق. مەكتەپتەرگە بۇل ورايدا قوسىمشا قاراجات بولىنەدى مە؟ ەگەر بولىنبەسە، ءمۇعالىمنىڭ ەڭبەگى، ماڭداي تەر اقىسى قايدان تولەنبەك؟، – دەگەن دەپۋتات ەگەر سىنىپقا وقۋشى سانىن 25-تەن كوبەيتۋگە شەشىم قابىلدانسا، وندا مەكتەپ ديرەكتورلارى ءوز قالتاسىنان ايىپپۇل تولەۋگە ءماجبۇر ەكەنىن ەسكە سالىپ، پاندەميا كەزىندە مەكتەپ ديرەكتورلارىنا ايىپپۇل تولەتۋ قانشالىقتى قيسىندى ەكەنىنە نازار اۋداردى.
– دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى 2020 جىلدىڭ 1 قىركۇيەگىنەن 2021 جىلدىڭ 26 ناۋرىزىنا دەيىنگى ارالىقتا كارانتين تالاپتارىن ساقتاۋعا بايلانىستى جالپى ءبىلىم بەرەتىن مەكتەپتەردە 1787 تەكسەرۋ، بالاباقشالاردا 104 تەكسەرىس جۇرگىزگەن. وسى نەگىزدە سانيتارلىق-ەپيدەميولوگيالىق نورمالاردى بۇزعانى ءۇشىن مەكتەپ ديرەكتورلارىنا جالپى سومماسى 18 ملن 3 23 مىڭ تەڭگە جانە بالاباقشالار مەڭگەرۋشىلەرىنە جالپى سومماسى 9 ملن 309 مىڭ تەڭگە ايىپپۇل سالىنعان. ديرەكتورلار، مەڭگەرۋشىلەر ءۇشىن اكىمشىلىك ايىپپۇل كولەمى 230 ايلىق ەسەپتىك كورسەتكىشتى نەمەسە 638 940 تەڭگەنى قۇرايدى، – دەدى ول.
وسى ورايدا، Nur Otan پارتياسى فراكسياسىنىڭ دەپۋتاتتارى ءبىرقاتار ۇسىنىستار بەردى.
اتاپ ايتقاندا، بىرىنشىدەن، باس سانيتار دارىگەر قاۋلىسىنىڭ تالاپتارىن، سىنىپتارداعى بالالار سانىن 25 ادامنان اسىرماۋ، مۇعالىمدەرگە جالاقى تولەۋ تەتىكتەرى تولىققاندى ءتۇسىندىرىلۋى قاجەت.
ەكىنشىدەن، وقۋشىلاردىڭ ءبىلىم ساپاسىن انىقتاۋ ءۇشىن، جاراتىلىستانۋ-ماتەماتيكالىق جانە قوعامدىق-گۋمانيتارلىق پاندەردەن ىبىراي التىنسارين اتىنداعى ءبىلىم اكادەمياسى، ۇلتتىق تەستىلەۋ ورتالىعىنىڭ ماماندارىمەن بىرلەسىپ، وقۋشىلاردىڭ پاندىك ولقىلىقتارىن، ياعني تۇسىنبەي قالعان كۇردەلى تاقىرىپتاردى قايتالاپ، ورنىن تولتىرۋدىڭ جەكە مارشرۋتىن ازىرلەۋى قاجەت. ءبىلىم جانە عىلىم مينيسترلىگى اۋىل جانە قالا مەكتەپتەرىندەگى ءبىلىم ساپاسىنىڭ الشاقتىعىن ازايتۋ تەتىكتەرىن ويلاستىرۋى ماڭىزدى.
ۇشىنشىدەن، ءبىلىم جانە عىلىم مينيسترلىگى اقپارات جانە قوعامدىق دامۋ مينيسترلىگىمەن بىرلەسىپ، ءداستۇرلى جانە ارالاس وقىتۋ فورماتىن ۇيىمداستىرۋ ەرەكشەلىكتەرى، سونىمەن بىرگە وقۋ پروسەسىنىڭ سانيتارلىق-ەپيدەميولوگيالىق قاۋىپسىزدىگىن قامتاماسىز ەتۋ تەتىكتەرى تۋرالى اتا-انالار ءۇشىن تولىققاندى ءارى كەڭ اۋقىمدى ءتۇسىندىرۋ جۇمىستارىن جۇرگىزۋى قاجەت.
تورتىنشىدەن، جەرگىلىكتى اتقارۋشى بيلىك ورگاندارى باس سانيتار دارىگەرلەرمەن بىرلەسىپ، وففلاين نەگىزدە سىنىپقا كەلەتىن 25 وقۋشىنىڭ ناقتى كريتەرييلەرىن انىقتاپ، ايماقتاعى ەپيدەميولوگيالىق جاعدايعا بايلانىستى ءداستۇرلى فورماتتا ءبىلىم بەرۋگە كوشۋگە يكەمدى شەشىم قابىلداۋلارىن ۇسىندى.
پىكىر قالدىرۋ