پرەزيدەنت قاسىم-جومارت توقايەۆ كوروناۆيرۋسقا قارسى ءىس-قيمىل جونىندەگى كەڭەستە دەنساۋلىق ساقتاۋ ءمينيسترى الەكسەي سوي مەن ۇكىمەتتتىڭ جۇمىسىن سىنعا الدى، دەپ حابارلادى اقوردا.
توقايەۆ ۆاكسيناسيانىڭ كەشىگۋى ابستراكتىلى ماسەلە ەمەس ەكەنىن جەتكىزدى.
– اڭگىمە ەلدىڭ ۇلتتىق قاۋىپسىزدىگى، ازاماتتارىمىزدىڭ دەنساۋلىعى مەن ءولىمى، جوعالعان كاسىپكەرلىك كىرىستەر، بيۋدجەتكە تۇسكەن سالىقتار جانە ۇلتتىق بايلىقتىڭ جالپى قۇلدىراۋى جايىندا بولىپ وتىر.
الەكسەي ۆلاديميروۆيچ، مەن سىزگە دەنساۋلىق ساقتاۋ ءمينيسترى – ۇكىمەتتىڭ شەشۋشى تۇلعاسى، ەرەكشە وكىلەتتىگىڭىزدىڭ بارىن ايتقانمىن. جۇمىستى جاقسى باستادىڭىز، كەيىن باسەڭدەپ كەتتىڭىز، – دەدى پرەزيدەنت.
توقايەۆ ەپيد احۋال جاقسارماسا، كادرلىق ءاۋىس-تۇيىس بولۋى مۇمكىن ەكەنىن ايتتى.
– ءساۋىر ايىندا جاعدايدى وزگەرتۋىڭىز كەرەك. ايتپەسە، كادرلىق اۋىسۋلار بولۋى مۇمكىن. بۇل سىزگە ۇنامايتىنى انىق. بۇل دەنساۋلىق ساقتاۋ مينيسترىنە عانا ەمەس، جالپى ۇكىمەتكە قاتىستى، – دەدى قاسىم-جومارت توقايەۆ.
سونىمەن قوسا پرەزيدەنت ەلىمىزدە قورعانۋ قۇرالدارىنىڭ تاپشىلىعى مەن ساپاسىنىڭ تومەندىگى بايقالعانىن تىلگە تيەك ەتتى.
– جەكەلەگەن وڭىرلەردە قورعانۋ قۇرالدارىنىڭ تاپشىلىعى مەن ساپاسىنىڭ تومەندىگى بايقالادى. ءبىز "سك-فارماسيا" باسشىلىعىن اۋىستىردىق. ءدال ءقازىر جاڭا باسشى باسقارۋ مۇمكىندىكتەرىن كورسەتەتىن ءسات. جاعداي رەتتەلمەسە جاڭا باسشى دا جۇمىستان بوساتىلادى، – دەدى پرەزيدەنت.
پىكىر قالدىرۋ