پرەزيدەنتتىڭ باسپا ءسوز حاتشىسى بەرىك ءۋالي حابار24 تەلەارناسىنا بەرگەن سۇحباتتا مەملەكەت باسشىسىنىڭ 2 جىلدا وتاندىق جۋرناليستەرمەن بەتپە-بەت وتىرىپ اڭگىمەلەسپەۋىنىڭ سەبەبىن ءتۇسىندىردى.

بەرىك ءۋاليدىڭ ايتۋىنشا، پرەزيدەنت سۇحباتتاسقانان گورى ىسكە دەن قويىپ، تاپسىرمالار بەرىپ، سونىڭ ورىندالۋىن قاداعالاعاندى ءجون سانايتىنىن، مينيسترلەر مەن اكىمدەردەن، اگەنتتىك باسشىلارىنان جۇمىستىڭ جۇزەگە اسۋ بارىسىن تالاپ ەتۋگە باسا ءمان بەرەتىن جەتكىزدى. دەسە دە الداعى ۋاقىتتا تەليەۆيزيالىق فورماتتا سۇحبات ۇيىمداستىرىلاتىنىن اتاپ ءوتتى.

سونداي-اق ول حالىق ۇنىنە قۇلاق اساتىن مەملەكەت تۇجىرىمداماسى جايلى ايتا كەلە الەۋمەتتىك جەلىدەگى پاراقشالارىن پرەزيدەنت ءوزى جۇرگىزەتىنىن، سول ارقىلى قوعامدا قىزۋ تالقىلانعان كوپتەگەن ماسەلەگە تىكەلەي تاپسىرما بەرگەنىن ايتتى.

ق.توقايەۆ پرەزيدەنت بولعان 2 جىلدان استام ۋاقىتتا گەرمانيالىق Deutsche Welle تەلەراديوكومپانياسىنا، رەسەيلىك تاسس اگەنتتىگىنە، "كومسومولسكايا پراۆدا" باسىلىمىنا، "مير" تەلەكومپانياسىنا، Bloomberg حالىقارالىق اقپارات اگەنتتىگىنە، قىتايلىق CCTV تەلەارناسىنا سۇحبات بەرگەن. قازاقستاندىق اقپارات قۇرالدارىنىڭ ىشىندە "ەگەمەن قازاقستان" جانە "ايقىن"، "انا ءتىلى" گازەتتەرىنە سۇحباتى جاريالانعان. الايدا جۇزبە-جۇز وتىرىپ وتاندىق بىردە-بىر تەلەارناعا سۇحبات بەرگەن جوق. مۇنى ەل ىشىندە پرەزيدەنتتىڭ قازاق ءتىلىن جەتىك بىلمەيتىنىمەن بايلانىستىرۋشىلار بار. اشىق دەرەككوزدەردە پرەزيدەنتتىڭ قازاق، ورىس، اعىلشىن، جۇڭگو جانە فرانسۋز تىلدەرىن بىلەتىنى جازىلعان.