باس پروكۋروردىڭ ورىنباسارى بولات دەمبايەۆ ماجىلىستە دەپۋتاتتاردىڭ قازاقشا قويعان سۇراعىنا جاۋاپ بەرە الماعانى بەينەلەنگەن ۆيدەو تاراپ جاتىر.

ۆيدەودان بولات دەمبايەۆتىڭ بىرىككەن اراب امىرلىكتەرىندە ءىستى بولىپ، جازاسىن وتەپ جاتقان قازاقستاندىقتاردى ەلگە قايتارۋ ماسەلەسى بويىنشا سويلەپ جاتقانىن اڭعارۋعا بولادى. الايدا ونىڭ كىبىرتىكتەپ، ەكى ءسوزدىڭ باسىن قۇراي الماي ايتقان جاۋابىنان بىرنارسەنى ۇعۋ قيىن.

قازاقستان كونستيتۋسياسىندا مەملەكەتتىك ءتىل – قازاق ءتىلى دەپ كورسەتىلگەن. مادەنيەت جانە سپورت مينيسترلىگى ءتىل ساياساتى كوميتەتىنىڭ دەرەگىنشە، قازاقستاندا مەملەكەتتىك ءتىلدى مەڭگەرگەن تۇرعىنداردىڭ ۇلەسى 90 پايىزعا جەتكەن. الايدا قازاق ءتىلىنىڭ ماسەلەسى قازاقستان قوعامىندا ءالى دە وزەكتى تاقىرىپتاردىڭ ءبىرى.

قازاقستاننىڭ ەكس-پرەزيدەنتى ن.نازاربايەۆ تا، قازىرگى پرەزيدەنت ق.توقايەۆ تا قازاق ءتىلىنىڭ قولدانىس اياسىن كەڭەيتۋ تارالى ءجيى قوزعاپ، "مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ مىندەتى"، "قازاقپەن قازاق قازاقشا سويلەسسىن"، "قازاقستاننىڭ بولاشاعى قازاق تىلىندە" دەگەن سەكىلدى سوزدەردى ءجيى ايتادى. ال ءماجىلىس دەپۋتاتى قازىبەك يسا سوتتار مەن قۇقىق قورعاۋ ورگاندارىنىڭ قىزمەتكەرلەرىن جانە بارلىق مەملەكەتتىك قىزمەتكەرلەردى قازاق ءتىلىن بىلۋگە مىندەتتەۋ كەرەك دەپ سانايدى.

ول "سۋعا تۇسپەي ءجۇزۋدى ۇيرەنۋ قانداي مۇمكىن بولماسا، مەملەكەتتىك ءتىلدى مىندەتتەمەي ونى ۇيرەنۋ دە سونداي مۇمكىن ەمەس" دەپ، جۋىردا ۇكىمەت باسشىسى اسقار مامينگە دەپۋتاتتىق ساۋال جولداعان.

وقي وتىرىڭىز:

♦ "كەت، قازاقشا سويلەمە". ەلوردادا قازاقشا قىزمەت ەتۋدى سۇراعان قاريانى كۇزەتشى يتەرىپ جىبەرگەن (ۆيدەو)

♦ قازاقتار قاشان قازاقشا سويلەيدى؟