پرەزيدەنت قاسىم-جومارت توقايەۆ قازاقستاندىقتاردى رامازان ايىنىڭ باستالۋىمەن قۇتتىقتادى. بۇل تۋرالى اقوردا سايتى حابارلادى.
توقايەۆ قۇتتىقتاۋىندا رامازان ايى كۇللى مۇسىلمان قاۋىمى ءۇشىن رۋحاني تۇرعىدان جاڭارۋ كەزەڭى ەكەنى ايتىلعان.
"ورازا ايىندا ءوزارا سىيلاستىق پەن مەيىرىم، ىزگىلىك پەن كەشىرىم سياقتى اسىل قاسيەتتەر دارىپتەلەدى. جۇرت كومەككە مۇقتاج جاندارعا قول ۇشىن بەرىپ، قايىرىمدىلىق كورسەتۋگە، ساۋاپتى ءىس اتقارۋعا ۇمتىلادى" دەپ جازدى پرەزيدەنت.
ونىڭ ايتۋىنشا، بيىل دا رامازان ايى كۇردەلى كەزەڭدە وتپەك.
"يسلام ءدىنىنىڭ وسىنداي مىزعىماس رۋحاني قۇندىلىقتارى مەن جاسامپازدىق الەۋەتى قوعامىمىزداعى بىرلىك پەن ىنتىماقتى ودان ءارى نىعايتۋعا ىقپال ەتەدى. وكىنىشكە قاراي، بيىل دا رامازان ايى كۇردەلى كەزەڭدە وتەتىن بولدى. جۇقپالى دەرتتى اۋىزدىقتاۋ ءۇشىن بارلىق شارالار جاسالۋدا. ەلىمىزدەگى مۇسىلمان جاماعاتىن قاۋىپسىزدىك تالاپتارىن ساقتاۋعا، قازاقستان مۇسىلماندارى ءدىني باسقارماسىنىڭ ۇسىنىمدارىن مۇلتىكسىز ورىنداۋعا شاقىرامىن.
ءبىز بۇل سىناقتى اۋىزبىرشىلىك پەن جاۋاپكەرشىلىكتىڭ ارقاسىندا ەڭسەرەتىنىمىز ءسوزسىز. تۇتقان ورازالارىڭىز قابىل بولسىن! ەلىمىزگە اماندىق، ءار شاڭىراققا باق-بەرەكە تىلەيمىن!" دەلىنگەن پرەزيدەنت قۇتتىقتاۋىندا.
پىكىر قالدىرۋ