بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا دەپۋتاتتار ەۋرازيالىق ەكونوميكالىق وداق تۋرالى شارتقا قىرعىزستاننىڭ قوسىلۋىنا قاتىستى ءبىرقاتار تۇزەتۋلەر ەنگىزەتىن حالىقارالىق كەلىسىمدەردى قارادى.
وسى رەتتە، ءماجىلىس ءتوراعاسى نۇرلان نىعماتۋلين حالىقارالىق شارتتاردى راتيفيكاسيالاۋ راسىمدەرىنىڭ مەرزىمدەرى كەيبىر مينيسترلىكتەر تاراپىنان جۇيەلى تۇردە بۇزىلاتىنىنا نازار اۋداردى.
مىسالى، ەۋرازيالىق ەكونوميكالىق وداق شەڭبەرىندە وسى ماڭىزدى راتيفيكاسيانى كەلىسۋدىڭ مەملەكەتىشىلىك راسىمدەرىن وتكىزۋ ءبىر جىلدام استام ۋاقىتقا سوزىلعان.
وسى ورايدا، نۇرلان نىعماتۋلين، ارينە، كوروناۆيرۋس ىندەتىن العا تارتۋعا بولار، ءبىراق ول ءبىزدىڭ ەلدە عانا ەمەس، بۇكىل الەمدى جايلاعانىن ايتا كەلىپ:
پاندەميا مينيسترلىكتەر جۇمىسىنىڭ قارقىنىن، ساپاسىن جانە جاۋاپكەرشىلىگىن تومەندەتۋگە سەبەپ بولماۋعا ءتيىس. بۇل جەردە باستى ماسەلە، قۇزىرلى مينيسترلىكتەر مەن قۇرىلىمداردىڭ بىرلەسكەن جۇمىسىنا بايلانىستى. جالپى ايتقاندا، حالىقارالىق كەلىسىمدەردى ۋاقىتىلى راتيفيكاسيالاۋ ينتەگراسيالىق پروسەستەر ءۇشىن وتە ماڭىزدى، - دەدى نۇرلان نىعماتۋلين.
پىكىر قالدىرۋ