الماتىلىقتار COVID-19-عا قارسى ۆاكسينا الۋعا شاقىرادى جانە ەكپە سالدىرعاننان كەيىنگى اسەرلەرىن ءبولىسۋدى جالعاستىرۋدا.

ەلىمىزدىڭ ءىرى مەگاپوليسىندە تۇرعىنداردى جاپپاي ۆاكسينالاۋ ءجۇرىپ جاتىر. ەكپە سالىناتىن 200-دەن استام پۋنكت كەلۋشىلەردى قابىلداۋدا. ۆاكسينالاۋ پۋنكتتەرىنىڭ ءبىر بولىگى وسو مەن بازارلاردىڭ بازاسىندا اشىلعان. ەكپە سالدىرعان الماتى تۇرعىندارى بۇل قادامعا نە ءۇشىن بارعاندارىن، پروسەدۋرانىڭ قالاي وتكەنىن جانە ءقازىر وزدەرىن قالاي سەزىنەتىندەرىن ايتۋدا.

 كوروناۆيرۋسقا قارسى ۆاكسينا الۋعا ەلەكتروندى جازىلۋ 8 ساۋىردە باستالدى. ەكپە سالدىرۋ ءۇشىن قالالىق ەمحانالار بازاسىنداعى پۋنكتتەردىڭ بىرىنە اپتانىڭ كەز كەلگەن كۇنى ساعات 8.00 مەن 20.00 ارالىعىندا جازىلۋعا بولادى. كوروناۆيرۋستان ۆاكسينالاۋ ەكى كەزەڭدە وتەدى. الدىمەن ءبىرىنشى ينەكسيانى سالدىرۋ قاجەت، 21 كۇننەن كەيىن ەكىنشىسىن الۋعا بولادى. ەكپە الۋعا جازىلعانداردىڭ بارىنە سمس جىبەرىلەدى، وندا قاي كۇنى جانە قاي ۋاقىتتا ەكپە الاتىنى كورسەتىلەدى. ۆاكسينانى 18 جانە ودان جوعارى جاستاعى ادامدار الا الادى.

ەگۋ پۋنكتتەرىندە بىلىكتى مەديسينا قىزمەتكەرلەرى كەزەكشىلىك اتقارادى. سونىمەن بىرگە، مەديسينالىق جوعارى وقۋ ورىندارى مەن كوللەدجدەردىڭ وقىتۋشىلارىنان قۇرالعان ەرىكتىلەر دە قىزمەت ەتەدى.

ۆاكسينا الۋعا كەلگەن الماتىلىقتار ءوز تاجىريبەلەرىمەن بولىسۋدە جانە ەكپەنىڭ قانشالىقتى پايدالى ەكەنىن ايتۋدا.

ەكپە العاندار اراسىندا ق ر دەنساۋلىق ساقتاۋ مينيسترلىگىنىڭ ارداگەرى، ءومىرىنىڭ 55 جىلىن مەديسيناعا ارناعان زينايدا سيەۆريۋكوۆا دا بار.

«مەن كوروناۆيرۋستان ەكپە الۋعا سانالى تۇردە كەلدىم. بۇل ينفەكسيا وتە ءقاۋىپتى، سوندىقتان ءاربىر ادام ءوزىنىڭ جانە جاقىندارىنىڭ ءومىرى ءۇشىن ۆاكسينا الۋى كەرەك. سوندا عانا ءبىز ۇجىمدىق يممۋنيتەت قالىپتاستىرامىز، ال بۇل ينفەكسيانىڭ الدىن الادى، تارالۋىنا جول بەرمەيدى، ەڭ قالىپتى ومىرىمىزگە ورالۋعا ىقپال ەتەدى»، - دەدى مەديسينا ارداگەرى ز. سيەۆريۋكوۆا.

الماتى تۇرعىنى الشىنباي نۇسىپبايەۆ تا وسىنداي پىكىردە. «مەن ەكپەنى جۇبايىممەن بىرگە الدىم. سەبەبى جاقىندارىمىزدىڭ، بالالارىمىزدىڭ دەنساۋلىعى ءۇشىن الاڭدايمىز. ينفەكسيانى جۇقتىرماۋدىڭ بىردەن ءبىر جولى – ەكپە الۋ»، - دەدى قالا تۇرعىنى.

قالا تۇرعىنى اندرەي بوگدانوۆ دا ۆيرۋستى تەك ۆاكسينالاۋ ارقىلى جەڭۋگە بولاتىنىن جانە ءوزىنىڭ ەكپە العانىن ايتتى.

«ۆيرۋستى جۇقتىرىپ، قاتتى اۋىرعان تانىستارىم دا، تۋىستارىم دا كوپ. مەن ەكپە سالدىرۋعا ارنايى كەلدىم، يممۋنيتەتتى ارتتىراتىن دا، كوروناۆيرۋستى جەڭەتىن دە ۆاكسينالانۋ»، - دەپ ەسەپتەيدى ا. بوگدانوۆ.

ۆاكسينالانعان الماتىلىقتار الەۋمەتتىك جەلىلەردە ءجيى پىكىرلەر قالدىرۋدا. مىسالى، ينستاگرام جەلىسىن قولدانۋشى @asel.abd پوستىندا ۆاكسينالاۋدىڭ ءبىرىنشى كەزەڭىنەن وتكەنىن جانە ءوزىن جاقسى سەزىنەتىنىن جازعان.

«بۇل مەنىڭ تاڭداۋىم جانە مەن تەك ءوزىمدى عانا ەمەس، اينالامداعى، اسىرەسە، تۋعان-تۋىستارىم مەن جاقىندارىمنىڭ دەنساۋلىعىنا ءقاۋىپ توندىرمەيتىنىمە سەنىمدىمىن»، - دەپ جازىپتى جەلىدە @asel.abd.

ۆورونيندەر وتباسى ءۇشىن ۆاكسينالاۋدىڭ ماڭىزدى ەكەنىن كسەنيا ۆورونينا فەيسبۋكتە جاريالادى. ول «مەنىڭ اجەمنىڭ جاسى 74-تە. بۇگىن ول ءوز ەركىمەن الماتىداعى ەمحانادا ەكپە الدى» دەپ جازدى.

دارىگەرلەر ۆاكسينالانعان قالا تۇرعىندارىنا ەكپە العاننان كەيىن ءۇش كۇن بويى ءوزىڭدى قالاي ۇستاۋ كەرەكتىگى ايتىلعان جادىنامالار بەرەدى.