ۆاشينگتون تۇرمەدە وتىرعان رەسەيلىك وپپوزيسونەر الەكسەي ناۆالنىي اباقتىدا قايتىس بولسا، ماسكەۋ ءۇشىن ونىڭ سالدارى اۋىر بولاتىنىن ەسكەرتتى.
ۇلىبريتانيا، فرانسيا، گەرمانيا جانە ەۋروپالىق وداق تا ونىڭ ەمدەلۋ جاعدايىنا الاڭداۋشىلىق ءبىلدىردى.
ناۆالنىيدىڭ دارىگەرلەرى ونىڭ ارقا اۋرۋى مەن اياعىنىڭ ۇيۋىنا شۇعىل مەديسينالىق كومەك كورسەتىلمەسە، "جاقىن كۇندەرى ول ولەدى" دەيدى.
رەسەيدىڭ ۇلىبريتانياداعى ەلشىسى ناۆالنىيعا نازارىن اۋدارىپ وتىرعانىن جانە "تۇرمەدە ولۋىنە جول بەرىلمەيدى" دەپ مالىمدەدى.
ول 31 ناۋرىزدا ءوزىنىڭ مەديسينالىق توبىنا كەزىگە الماۋىنا نارازىلىق رەتىندە اشتىق جاريالادى. ونىڭ دارىگەرلەرى جاقىنداعى قان ءاناليزىنىڭ ناتيجەلەرىنەن كەيىن ناۆالنىيدىڭ بۇيرەك قىزمەتى ناشارلاپ، كەز كەلگەن ۋاقىتتا جۇرەگى توقتاۋى مۇمكىن ەكەنىن ايتقان.
الەكسەي ناۆالنىي رەسەيلىك وپپوزيسيونەر، جەمقورلىققا قارسى كۇرەس قورىنىڭ نەگىزىن قالاۋشى. 2018 جىلى وتكەن پرەزيدەنت سايلاۋىنا قاتىسپاق بولعانىندا كانديداتۋراسى الىنىپ تاستالعان. 2020 جىلعى تامىزدا ونى الدەكىمدەر ۋلاپ، ءولىم اۋزىنان قالعان. الەكسەي ناۆالنىي بۇعان رەسەي پرەزيدەنتى ۆلاديمير ءپۋتيندى ايىپتادى. دەنساۋلىعى وڭالعان سوڭ ناۆالنىي ءوزىن ۋلاعانداردى انىقتاۋ ماقساتىندا زەرتتەۋ جۇرگىزىپ، ونىڭ ناتيجەسىندە ءوزىن پۋتين ۋلاعانىن ايتادى. ۇزاماي ناۆالنىي ەم العان گەرمانيادان وتانى – رەسەيگە ورالىپ، ماسكەۋگە قونعان بويدا ۇستالادى. سوت ونى مەرزىمىنەن بۇرىن بوستاندىققا شىعۋ شارتىن بۇزدى دەگەن ايىپپەن سوتتادى. الەكسەي ناۆالنىي بۇنى "ءوزىنىڭ ءۇنىن ءوشىرۋ ءۇشىن ادەيى جاسالعان بيلىك ارەكەتى" دەپ سانايدى. سونداي-اق ناۆالنىي قامالعاننان كەيىن ونىڭ كومانداسى "ءپۋتيننىڭ ءزاۋلىم سارايى" تۋرالى دەرەكتى فيلم شىعاردى. فيلم youtube جەلىسىندە 100 ملن-نان استام قارالىم جيناپ، الەمنىڭ كوپتەگەن ەلىندە كورىلدى. كرەمل "فيلمدە ايتىلعان دەرەكتەر شىندىققا جاناسپايدى" دەپ مالىمدەدى. ارتىنشا، رەسەيدىڭ 10-داعان قالاسىندا ناۆالنىيدى بوساتۋدى تالاپ ەتكەن ميتينگتەر ءوتتى. نارازىلىق اكسيالارى كەزىندە بەلسەندىلەر جاپپاي قامالدى.
پىكىر قالدىرۋ