پرەزيدەنت قاسىم-جومارت توقايەۆ تاتارستان پرەزيدەنتى رۋستام ميننيحانوۆپەن كەزدەستى. بۇل تۋرالى اقوردا سايتى حابارلادى.
مەملەكەت باسشىسى تاتارستان پرەزيدەنتىنىڭ جاقىندا قاراعاندى وبلىسىنا جاساعان ساپارىن جوعارى باعالادى. سول ساپار كەزىندە ساران قالاسىندا دوڭگەلەك شىعاراتىن زاۋىت ىسكە قوسىلعان بولاتىن.
– ءبىز بۇل كاسىپورىنعا ۇلكەن ءۇمىت ارتىپ وتىرمىز. قازاقستاندىقتاردىڭ ۇلكەن ءبىر توبىنا تاتارستاندا ءبىلىم الۋعا مۇمكىندىك جاساعانىڭىز ءۇشىن ريزاشىلىعىمدى بىلدىرەمىن. مەن مۇنى بۇدان كەيىن دە جالعاسى بولاتىن ناقتى جوبا دەپ بىلەمىن. ءبىزدىڭ نارىقتا "تاتنەفت" كومپانياسىنان باسقا، "كاماز" كاسىپورنىمەن بىرلەسكەن جوبالارىمىز دا بار، – دەدى توقايەۆ
پرەزيدەنت تاتارستانمەن مادەني-گۋمانيتارلىق بايلانىستاردى ودان ءارى نىعايتا بەرۋگە بەيىلدى ەكەنىن جەتكىزدى.
– ءبىز تاتار مادەنيەتىن وتە جاقسى بىلەمىز جانە قۇرمەتتەيمىز. سىزدەردىڭ مادەنيەتتەرىڭىز ءبىزدىڭ ەلدە كەڭىنەن تانىمال. تاياۋ ۋاقىتتا، پاندەميا بىتكەننەن كەيىن قازاقستاندا تاتارستان مادەنيەتى مەن ونەرىنىڭ كۇندەرىن وتكىزۋگە كەلىسەمىز دەپ ويلايمىن. ءبىز بۇل ءىس-شارانىڭ تابىستى ءوتۋى ءۇشىن بارلىق جاعدايدى جاسايمىز، – دەدى مەملەكەت باسشىسى.
توقايەۆ رۋستام ميننيحانوۆقا نۇر-سۇلتان قالاسىنان تاتار حالقىنىڭ كورنەكتى وكىلى، ايتۋلى اقىنى عابدوللا توقايدىڭ اتىنا ءبىر كوشە بەرىلەتىنى جايىندا ايتتى. بۇل ەكى حالىق اراسىنداعى ىنتىماقتاستىقتىڭ جارقىن بەلگىسىنىڭ ءبىرى بولماق.
پىكىر قالدىرۋ