بۇعان دەيىن ءبىرتانوۆقا وتباسى مۇشەلەرى مەن ادۆوكاتىنان وزگە ەشكىممەن سويلەسۋگە بولمايتىن. ءتىپتى وعان شاشتاراز دا كىرگىزىلمەگەن. ەندى جاڭا شارالارعا بايلانىستى ول جۇمىسقا بارا جاتىپ جولاي جولىققان ادامدارمەن سويلەسە الادى. 8:00 مەن 19:00 ارالىعىنان تىس ۋاقىتتا شەكتەۋ بۇرىنعىشا قالا بەرەدى.

ەلجان ءبىرتانوۆ 2020 جىلعى 3 قاراشادا قاماۋعا الىنعان. ول اسا ءىرى كولەمدە بيۋدجەت قارجىسىن ىسىراپ ەتۋ فاكتىسى بويىنشا كۇدىككە الىنعان. 7 قاراشادا ءبىرتانوۆقا قاتىستى بۇلتارتپاۋ شاراسى وزگەرتىلىپ، ءۇي قاماققا الىنعان. مۇنان سوڭ ءۇي قاماققا الۋ شاراسى الدەنەشە رەت ۇزارتىلعان.

ەكس-مينيستردىڭ ادۆوكاتى دميتريي كۋرياچەنكو ءبىرتانوۆتى ءۇي قاماقتا نەگىزسىز ۇستاپ وتىر دەپ سانايدى. ونىڭ ايتۋىنشا، بۇل تەرگەۋ ىسىنە كەدەرگى كەلتىرىپ جاتىر، وسىلايشا تەرگەۋشىلەر ەلجان ءبىرتانوۆتى قۋدالاۋدىڭ بارلىق سەبەپتەرىن قاراستىرۋى مۇمكىن.

– ەكس-مينيستردىڭ اقشا جىمقىرۋ جانە ىسىراپ ەتۋ فاكتىسىنە ناقتى دالەلدەر تابىلعان جوق. كەرىسىنشە، ونىڭ كىناسىزدىگىن راستايتىن فاكتىلەر جەتەرلىك. نەگىزگى كۇدىك حورۆاتيالىق "ەريكسون نيكولا تەسلا" كومپانياسىنىڭ ينتەگراسيالانعان دەنساۋلىق ساقتاۋ پلاتفورماسىنىڭ جەتكىزۋشىسى جاساعان بولجامدارعا نەگىزدەلگەن. الايدا ءتىپتى "EGOV" سايتىندا ازاماتتار انىقتاعان مەديسينالىق مەكەمەلەردە تىركەۋ تۋرالى جاقىندا بولعان جانجال پلاتفورمانىڭ جۇمىس ىستەپ تۇرعانىن راستايدى. باس پروكۋراتۋرا ءبىرتانوۆتى قورعاۋدىڭ ءوتىنىشىن قولداپ، تەرگەۋ تۋرالى "ەريكسون نيكولا تەسلانىڭ" قاتىسۋىمەن قايتا ساراپتاما تاعايىندادى، – دەپ مالىمدەگەن دميتريي كۋرياچەنكو.

الدىمەن 2020 جىلعى 5 قاراشادا قازاقستانداعى بەلگىلى 10-نان استام دارىگەردىڭ ءبىرتانوۆتى قولداپ جازعان اشىق حاتى جاريالاندى.

اشىق حات اۆتورلارى ءبىرتانوۆ جۇمىستى ءتيىمدى ىستەگەنىن، پاسيەنتتەر مەن ارىپتەستەرىنە اشىق مينيستر بولعانىن تىلگە تيەك ەتىپ، ونىڭ قاراپايىم سانيتاردان باستاپ، تاكسيكولوگ دارىگەر، ءبولىم مەڭگەرۋشىسى، عىلىمي ورتالىق پەن مەديسينالىق حولدينگ جەتەكشىسى، مينيستر قىزمەتتەرىن اتقارعانىن العا تارتقان.

سونداي-اق دارىگەرلەر ءبىرتانوۆتاي بىلىكتى ۇيىمداستىرۋشىنىڭ جەمقورلىق دەرەگىنە قاتىسى بارىنا كۇمان كەلتىرەتىندەرىن ايتىپ، ونىڭ ەلگە مىقتى مامانداردى تارتۋداعى ەڭبەگىن، دەنساۋلىق ساقتاۋ جۇيەسىنىڭ دامۋىنا قوسقان ۇلەسىن، مەديسينا قىزمەتكەرلەرى ەڭبەكاقىسىن ارتتىرۋعا ىقپال جاساعانىن اتاپ وتكەن.

ال 2020 جىلعى 6 قاراشادا نيەۆروپاتولوگ-دارىگەر قايىرعالي كونەيەۆ "ءبىرتانوۆقا تاعايىندالعان بۇلتارتپاۋ شاراسىن وزگەرىسسىز قالدىرۋدى تالاپ ەتكەن" ونلاين-پەتيسيا ىسكە قوسقان.

پەتيسيا اۆتورىنىڭ سوزىنشە، ءبىرتانوۆ رەپۋتاسياسىن ساۋىقتاندىرۋعا ارنالعان الەۋمەتتىك جەلىدەگى كامپانيا "بيۋدجەت قارجىسىن ىسىراپ قىلعانى" ءۇشىن ۇستالعان ءمينيستردى "پاندەمياعا دايىن بولماعانى ءۇشىن ايىپتادى" دەپ قوعامدى اداستىرىپ وتىر. اۆتور "كامپانيا ۇيىمداستىرۋشىلارى وسى ارقىلى مەملەكەتتىك ورگاندارعا قىسىم كورسەتىپ وتىر" دەپ سانايدى.

پەتيسيا ۇيىمداستىرۋشىلارى ەلجان ءبىرتانوۆتىڭ جاقتاستارىنا قاتىستى قىلمىستىق كودەكستىڭ 407-بابى 2 تارماعى بويىنشا (سوتقا دەيىنگى، جان-جاقتى، تولىق جانە وبەكتيۆتi تەرگەپ-تەكسەرۋگە كەدەرگi جاساۋ ماقساتىندا پروكۋروردىڭ نەمەسە سوتقا دەيىنگى تەرگەپ-تەكسەرۋدى جۇزەگە اسىراتىن ادامنىڭ قىزمەتiنە قانداي دا بولماسىن تۇردە ارالاسۋ) قىلمىستىق ءىس قوزعاۋعا شاقىرىپ، سوت پروسەسى اياقتالعانعا دەيىن ەكس-مينيستردى قاماۋدا ۇستاۋ شاراسىن وزگەرتپەۋدى تالاپ ەتتى.

ەكس-مينيستردىڭ كۇتىككە ىلىنۋىنە قاراما-قايشى كوزقاراس الەۋمەتتىك جەلىدە دە بايقالدى.

ءبىرتانوۆتى جاقتاۋشىلار ونىڭ قوعامعا اشىق مينيستر بولعانىن اتاپ ءوتىپ، "ءبىرتانوۆ ءىسى" فارماسيەۆتيكا لوببيستەرى اراسىنداعى ساياسي تاپسىرىس بولۋى مۇمكىن ەكەنىن جازعان.

الايدا 2019 جىلعى مامىر-تامىز ايلارىنداعى قايتىس بولعاندار مەن 2020 جىلعى سايكەس كەزەڭدە ولگەندەر اراسىنداعى 31 مىڭ ايىرماشىلىقتى ايتىپ، بۇرىنعى مينيستر جاقتاستارىن سىناپ جاتقاندار دا بار. سونداي-اق ولار ءبىرتانوۆ ۆيسە-مينيستر، مينيستر بولعان جىلدارى اۋرۋحانالارداعى توسەك ورنىنىڭ 24 مىڭ 960 ورىنعا كەمۋىنە جول بەرگەنىن ءمالىم ەتتى.