كريپتوۆاليۋتا نارىعىندا بيتكوين 15 ساۋىردە ەڭ جوعارى دەڭگەيگە جەتكەن سوڭ، كۇرت تومەندەپ، 49%-عا دەيىن قۇلادى. ايماقتىق ەسەپتەردە الەمدەگى Bitcoin ءوندىرىسىنىڭ جارتىسىنان استامىنا يەلىك ەتەتىن قىتايدا شىڭجاڭ تورابىندا ەلەكتر جارىعى ءسونىپ، "قاۋىپسىزدىك تەكسەرىستەرى" ءجۇرىپ جاتقانى ايتىلدى.
بيتكوين تۇسە باستاعان كەزدە ايماقتىق كريپتوۆاليۋتا مامانى، جۋرناليست كولين ۆۋ Twitter-دە قىتايداعى ەلەكتر جەلىلەرىنىڭ ءوشۋى تۋرالى جازدى.
"24 ساعات ىشىندە بيتكوين وندىرەتىن باسسەيندەردىڭ حەشرەتى كۇرت تومەندەدى. انتپۋل 24،5%، Btc.com 18،9%، پۋلين 33%، Binance 20% تومەندەدى. سەبەپ – قىتايدىڭ سولتۇستىك-باتىسىندا قاۋىپسىزدىك ينسپەكسياسى ءۇشىن تولىق جارىق ءسوندىرىلدى" دەپ جاريالادى جۋرناليست Twitter-دە.
"تەك 24 ساعات ىشىندە الەمدەگى كريپتوۆاليۋتالاردىڭ جالپى نارىقتىق كاپيتاليزاسياسى شامامەن 310 ميلليارد دوللار جوعالتىپ، نارىق ءبىر كۇندە شامامەن 2،2 تريلليوننان 1،9 تريلليون دوللارعا دەيىن تومەندەگەن" دەپ حابارلادى Forbes.com.
ەسەپتەر بويىنشا، الەمدەگى Bitcoin ءوندىرىسىنىڭ جارتىسىنان استامى قىتايدا ورنالاسقان. ول حەشرەتتىڭ 65%-ىن قۇرايدى. شىڭجاڭ ايماعى BTC ءوندىرىسىنىڭ ەداۋىر بولىگىن يەلەنگەن. اقپاراتقا سايكەس، ءوندىرىستىڭ 20%-دان 36%-عا دەيىنگى ۇلەسى شىڭجاڭعا تيەسىلى.
شىڭجاڭداعى قازاق جانە ۇيعىر سياقتى ازشىلىق قاۋىمنىڭ قۇقىعىنىڭ بۇزىلۋى ماسەلەسىن حالىقارالىق ۇيىمدار ءجيى كوتەرىپ ءجۇر. جاقىندا عانا The New Yorker باسىلىمى قازاق قىزىنىڭ شىڭجاڭداعى قايتا تاربيەلەۋ ورتالىعىنداعى ءومىرىن ەگجەي-تەگجەيلى باياندايتىن ماقالا جاريالاعان.
پىكىر قالدىرۋ